إشي خيال يا ناس :)

أصفر وإلا أبيض هو أول سؤال يتبادر إلى ذهني عندما ألمح

:) ساعي البريد يقترب بعجلته المرسيدس

أمام مقر عملي

حيث أن الجوابات الصفراء في ذلك الورق الأشبه بورق اللحمه القديم

هو غالباً جواب من جهه رسميه وبالأخص الضرائب

(إوعى حد فيكم يكون بيلبس العمه للزبون)

وفوجئت به يسألني هذه المرة وهو ممسك بجواب أبيض مكلبظ

!إنت ضايع منك ورق يا دكتورة؟

قلت :لأ بكل ثقه

ولكن إذ فجأة تبادر إلى ذهني

ذلك الحادث الذي تعرضت له من أكثر من 18سنه

وفقدت فيه حقيبة يدي العمرانه أن ذاك

إييييييييييه

كانت أيام

ولا تتصوروا مدى سعادتي ودهشتي وأنا أفتح الظرف لأجد الأتي

• قسيمة الزواج
• بطاقتي الشخصيه القديمه
• رخصة السواقه التي إنتهت مدتها بالفعل
• عدد 2تذكرة سوبرجيت من الإسكندريه الى القاهرة بتاريخ ذلك اليوم الذى تمت فيه السرقه طبعاً
• عدد3صور لإبن بنت عمتي والذي وصل الأن الى السنه النهائيه فى كلية الهندسه

وأوراق كثيره ليس لها أهميه بالمره

والحقيقه أن وصول هذا الظرف في هذا الوقت أدهشني فعلاً

فلقد أعادني لذكريات مر عليها أكثر من 18سنه

وطبعاً حضرتي شربت المر وقتها عشان أطلع بدل فاقد من الأوراق

الرسميه التي فقدتها فى ذلك اليوم من رخصه وبطاقه وجواز سفر

وهو الشىء الوحيد الذي لم يعد مع باقي الأوراق

الرسميه الهامه والتي فقدت الأمل ان تصلني

كما يحدث فى جواب من مجهول بعد الحادث

ومن حسن الحظ أننا قمنا بعمل محضر رسمي

وسين وجيم في وقتها والذي حفظ طبعاً ضد مجهول

ولا عزاء للمسروقين

ههههههههههههههه

والسرقه تمت ببساطه شديده جداً جداً

حيث كانت الحقيبه معلقه على يد الكرسي ووسط الزحام

مرّت إحداهن

علقت الشنطه

وطلعت

وطبعاً لم ألحظ إختفائها إلا عندما هممنا بمغادرة المكان

إذا كنتم ما زلتم تقرأون

ومستغربون

فإليكم الأغرب من وجهة نظري

إحتفظ هذا الشخص بالورق لمدة 18سنه

!!!!!!!!!

وبحاله جيده

هههههههههههه

طب ليه؟

ولماذا أرسله بعد كل هذه السنين؟؟؟

كتب على الظرف إسمه وعنوانه

هو صحيح مش واضح قوي بس اكيد ممكن اي حد إسكندراني يوصل له

معنى كده إنه مش ممكن يكون السارق الأصلي

وإلا رأيكم إيه؟طب لو مش هو السارق

الورق ده وصله إزاي؟؟؟

مع العلم أن الحقيبه كان بها مبلغاً من المال

وقطعة من المشغولات الذهبيه

طب بذمتكم لو الموقف ده جه في فيلم وإلا مسلسل

مش كنتم حتقولوا ده كلام روايات

وخيال كتّاب؟؟؟؟؟؟

ملحوظه:الصورة من تصوير إسكندراني قوي ومأخوذه من غير إستئذان المرة دى

هههههههههههههههههه

أنا وسواقين الأسود ف أبيض

بدأت الحكايه عندما قررت النزول الى المحروسه لمقابلة صديقتي العائده فى إجازة

وإنتهت بكتابة هذه السطور وأنا فى القطار في طريق العوده

وطبعا اللى يشوفني وانا نازله ما يشوفنيش وأنا راجعه

:):):)

اول مفاجئه فى الصباح ع المحطه القطار وصل متأخر ساعه

عادي الحمد لله إنه ما إتأخرش اكثر من كده!!!

لما وصلنا محطه رمسيس

خرمت ودني كلمه سائح ألمانى بيؤكد على قيمه الوقت فى بلدنا

هروبا من الزحمه ركبت المترو لحد سراي القبه

ومنها كان اول لقاء بيني وبين اول سواق

• أخر مكرم عبيد؟
• أخره؟
• أيوة
• حتاخد كام؟
• اللى تدفعيه
• لا انت تقول يا اوافق يا خلاص

بريزه وعشان خاطرك بس

ركبت لانى كنت مقدرة المشوار ما يزيدش عن كده والراجل عايز يقنعني ان المشوار ما يقلش عن 13جنيه

ما علينا

فى هذا اليوم لم اضطر للتعامل مع اى سائق تاني

اليوم الثانى اول سائق راجل كبير

• العباسيه عمر أفندي؟
• إتفضلي
• حضرتك حتاخد كام؟
• قال مبتسماً ميّه ينفع ؟

ركبت وإديته اللى فيه النصيب والراجل حمد ربنا على رزقه

المشوارالمهم بقا واللي قال عملت فيها حويطه وسألت من مكرم عبيد لفيصل المشوار بكام

قالوا لي ما بين خمسه وعشرين ل خمسه وثلاثين وانت وحظك

شاورت لتاكسي

فيصل؟

إتفضلي

كام؟

قال مصطلح ما فهمتوش بس إتضح فيما بعد إن معناه خمسه وعشرون:)

و فرحت طبعا مش عشان المبلغ اللي طلبه وانما عشان رضي يوصلني

شفتوا اخرتها سعاده لمجرد انك تلاقي سواق يوافق يوصلك

ما علينا

بيني وبينكم ابتديت اتضايق من حكايه المقاوله مع كل سواق قبل ما اركب

ليه ما يبقاش فيه تعريفه مقبوله للكل بدل الخناقات اللي بتحصل بين الطرفين غالبا

ثالث يوم الصبح

وقفت انادى واقول ميدان لبنان؟

ولا حد راضي يعبرنى وخيل لي للحظه

أنني أطلب منهم الذهاب الى ارض المعركه او ان مخيم نهر البارد قد تم نقله الى هناك

المهم اضطريت اطلع على اول الشارع واركب اول تاكسى يقف

من غير مقاوله بقا واللى يحصل يحصل

دول ما كانوش يومين

وصلت المكان المطلوب وطلّعت للراجل عشرين جنيه على اساس ان المشوار ما ياخدش

اكثر من سبع ثمن جنيهات بصيت لقيته مطلع لي خمستين وراسى بقا والف سيف

إزاي ده المشوار ما يزيدش عن سبعه جنيه وابتديت ازعق

راح مطلع لى اتنين جنيه وقال لى انا برضه الحق عليا

ابن الّذين00000

و من بعدها ركبت مرتين بس كنت وصلت لمرحله من الأعياء والإنهاك من كتر المناهده

والاكيد ان الاتنين اخدوا مني اكتر بكتير من الأجرة الحقيقيه

طبعا ابناء مصر المحروسه ما بيتنقلوش بهذه الوسيله فى كل المشاوير

وإذا كانوا كذلك فربنا يكون فى عونهم

ملحوظه:فى طريق العوده كتبت اكثر من عشرصفحات عن هذه الرحله لأنها الأولى من بعد ما إبتديت تدوين