القاموس الشامي الجزء الثاني

الأخوة الأعزاء أبناء الأمه العربيه الواحده

حلوة المقدمه دي

حاولت ان اقسم القاموس على جزئين

بس واضح إنه حيبقا فيه جزء ثالث

يا إيدكم *

تعبير عن الهرب من شيء ما بسرعة

زمق*

أي هرب ببراعة وحذق، وزمط شرحو

مأنّف*

يعني لا يعجبه العجب ولا الصيام برجب

جفص*

صفة للجلف غليظ الروح

كل طلقة براحة*

أي يقوم بالشيء رويداً رويداً بين الفينة والأخرى

على كراريت حلقو*

يعني مصاب بغثيان شديد وإقياء لا يستطيع كبحه لا بحلال ولا بحرام

لا تكرّك عليه*

يعني لا تلح عليه إصراراً

لحم السير عالقبقاب وصاروا المبغضين صحاب*

مبينه وما بدها شرح

يلي بيجي منمدلّه فرشة ويلي ما بيجي منرتاح من وشه*

مثل نسائي بحت يفيد عدم الترحيب بأشخاص معينين ما عم يجوا أصلاً

شو هالتجرة*

يعني الأفندي ما عجبته هالحكاية كلها وحاسس إنو تعبو ذهب سدى أو أدراج الرياح

كمان مشاني سيبويه الله يرحمو

وحياة خالقك ماني مفارقك*

تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس

بدي دايئك

العين الطرّاءة*

عبارة عن التمسخر على المتكلم عنه وأن لا شيء فيه بينحسد عليه

بيقطش وبيلحش*

يعني المهذار كثير الهفوات ومن يهرف بما لا يعرف ولسانه يسبق عقله

ولي على كسرتو*

تعبير يفيد التحسّر على شخص ما مع لومه على ما فعل (في تناقض، موهيك؟)

مو نفعان لا للخل ولا للخردل*

يعني بلا فائدة تذكر، وأحياناً بقولو من نافع لألله بنافعة

لاطيلو*

يعني كمن له منتظراً

ومنها المتل القائل: "قلّو لاطيلك قلّو صاحيلك"

يعني هدول تنين ناويين عالشر لبعض وكل واحد منتبه للتاني بس بدون كبريته ليشعلو

خسكار*

كمية من العمل المقرر ليوم واحد أو بضاعة معدّة للبيع ضمن اليوم

ما صرلو بالقصر إلا مبارح العصر*

يعني أنه جديد على أمر ما وغرّ فيه

ولاد آدو*

يعني المشكلجية والعونطجية وولادين الحرام (يالطيف الله يبعدون عنا وعنكن

قولوا أمييييين