السبت، مايو 19

زقزق وقاللى ازيك

زقزق وقال لى ازيك
ده انا كل يوم بانده لك
مش عايزة تردى براحتك
بس انا مش سبب جرحك
انا جايلك وفارد جناحى
نطير انا وانت فى العالى
الكون ده كله بتاعنا
ولا حد يقدر يمنعنا
هنحكي ونعللى صوتنا
ونسمع العالم غنانا
مانا صوتي لوحدى مش كفايه
محتاج اصوات تانيه معايا
صوتك وصوت اللى جنبك
واللى جنب اللى جنب اللى جنبك
يتهد جدار الصمت جوانا
ونسمع اللى عمره ما كان ويانا

هناك 37 تعليقًا:

شادي فايد يقول...

شايفة القمر يا وهيبة

:)

gohayna يقول...

احساس رائع بالنطلاق

كلمات بتشعرك بالقوه والسعاده الي بقالها كتير مفقوده

عرفه شعور الانطلاق بلاحدود ولا عقبات

بلا حسابات

بجد نفسي اجربه من غير خوف

من غير قلق علي النتائج

ياريت نطلع عن حودود الجسد والمكان والزمان

ونحلق نحو الاشيء
بس نبقي عارفين اننا هنكون سعداء

تسلم ايديك ياقمر

تحياتي ليكي علي الدوام

Xee يقول...

اهو علشان الكلام الجامد ده انا حطيت لينكك في مدونتي تحت اسم : لوميات

لوحه رائعة


تحياتي
قال صيدله قال
:)))

loumi يقول...

شادى
شايفه يا مخيمر
:):):):):):)

loumi يقول...

سهل جدا يا جى جى
غمضى عنيك
و اسرحى
حتلاقى نفسك فى المكان اللى انت
نفسك تكونى فيه
ومع الناس اللى تحبى تكونى معاهم
جربى وما تخافيش
لو خفتى مش حتقدرى تجربى
تحياتى

loumi يقول...

زى
بيسعدنى تعليقك
اسكت انا قعدت ماما والاولاد وقريتلهم
شومباكا
ويسقط مقيلس سيلزيوسامى فضلت تضحك لحد ما انا دموعى نزلت
هههههههههههههههههههههه
تسلم يا زىىىىىىىىىىىىىىى

كراكيب عادل يقول...

احلي زقزقة

لاحلي عصافير

يارب يبعد عنهم الصيادين

وكمان الفضولين

والغربان بتوع البين

ويبعد عنهم الحسد والعين

وهنيالك يا فاعل الخير

حسنة قليلة تمنع بلاوي كتيرة

الهي ما يوقعك في ضيقة

وما تحتاجي لدوا كحة

كح كح كح كح كح

loumi يقول...

عادل
عادل
ايه يا ابنى نظام الشحاته ده
حنفعد على باب السيده ونقول عشانا عليك يا رب
هههههههههههههههه
توسيفان من غير ان بيعمل دماغ كده
بس مش معلقه معقله
تحط بق الازازه على بقك
ما تنزلهاش غير على اخر نقطه
و بعدين
تبتدى تهرش فى كل حته
ههههههههههه

.:.-=- ELGaZaLy-=-.:. يقول...

مانا صوتي لوحدى مش كفايه
محتاج اصوات تانيه معايا
صوتك وصوت اللى جنبك

.:.-=- ELGaZaLy-=-.:. يقول...

انا مكملتش معرفش البتاع دة راح لية



رقيقة اوى بجد وكلامك حساس جدااااااااا

بجد

كلام لوجيك يقول...

ماشاء الله عليكى
جميلة قوي ومعبرة رغم بساطة كلماتها
الا معناها قوي
عنوانها اكثر من رائع ونهايتها اجمل ختام
يتهد جدار الصمت جوانا
ونسمع اللى عمره ما كان ويانا
مدونتك دسمة جدا ووعد هوزرك باستمرار انشاء الله

خالص مودتى
دمتى بكل خير

loumi يقول...

يا غزالى
معلش بس كل مره اسمك بيفكرنى باغنيه
المره دى اغنيه يا غزالى لحميد الشاعرى
دعابه دعابه ماتزعلش.
والله كلامك اخجلنى
بس عارف اوقات بنفضل نتكلم ونتكلم وما حدش بيسمعنا
ومتهيألى هى دى سياسه الوضع الحالى
اتكلموا بس ما حدش حيسمعكم
و برضه حنعمل اللى احنا عايزينه
تقريبا هى سياسه تفريغ طاقات فى الكلام
وبرضه حاتكلم عشان اسمع اللى مش وايانا

loumi يقول...

العزيز اسامه
ربنا يخليك يا رب
بس ده كلام كبير عليا قوى
انا سعدت بزيارتك الاولى لى واتمنى ان تستمر كما وعدتت ووعد الحر دين عليه
انا زرت مدونتك الاخيره
بجد مجهود رائع وافكار جميله وبسيطه
عشان كده بتوصل بسهوله
بس هو انت بجد ما كنتش تعرف ازاى تغسل التى شرت؟
ههههههههههه

Hannoda يقول...

كلامك خلاني أسأل نفسي

حايحصل ايه لو كل واحد زاح جروحه بعيد شوية عشان يعرف يشوف اللي حوليه

مش عايزة تردى براحتك
بس انا مش سبب جرحك

لو حطينا الجملة ده فبالنا دايما.. حانعيش مشاعر جميلة جدا مع بعض

loumi يقول...

هنوده
سعيده بان كلامى خلاكى تفكرى
وانا عارفه انك من الناس الدائمه التفكير

مش عايزة تردى براحتك

مهم قوى ان احنا نحترم خصوصيه اللى قدامنا
مش لازم نقتحم حياتهم ونلبد

بس أنا مش سبب جرحك

بس لازم برضه نوضح لهم الخطاء اللى هما واقعين فيه واحنا شايفينه وهما لأ
و خصوصا لو بيهمونا
وما ناخدش ناس بجراير ناس تانيه
لو اهتمينا بالناس اللى حوالينا زى ما بنهتم بنفسنا
الحياه حتبقا اجمل كتير
وانا عارفه برضه انك من الناس دى
بابقا سعيده قوى بتعليقاتك

حقى اهرتل يقول...

انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق

loumi يقول...

حقى اهرتل
شكرا لزيارتك
و مبروك عليك مدونتك
و هرتل يا عم براحتك
تحياتى

Hannoda يقول...

لومي.. رغم إني وصلت من كلامك لتفاصيل حبتها لكن ردك أضافلي معنى زعلت من نفسي عشان ما حستهوش


مهم قوى ان احنا نحترم خصوصيه اللى قدامنا
مش لازم نقتحم حياتهم ونلبد


ده المعنى اللي أقصده

bocycat يقول...

لومى كلامك جميل اوى وكله احساس تصدقى انا فى وقت من الاوقات كنت عايزة ابقى عصفورة عشان احس ان الكون ده بتاعى اسافر فى اى مكان وفى اى وقت .. تحياتى

loumi يقول...

هنوده العزيزه
الكلام بيحمل معانى كتيره
وكل مرة لو قريتى نفس الكلام
ممكن تكتشفى حاجات ما كنتيش واخده
بالك منها بس ده ما يزعلش لان فى اوقات بتبقا فيه حاجه معينه احنا بندور عليها ونفهم الكلام على اساسها
بس ده ما يمنعش ان فى افكار تانيه موجوده بس ما لمستناش.
ويا رب ما اكونش يبب انك تزعلى من نفسك تانى:)

loumi يقول...

بوسى كات
اول مرة تيجى عندى
سعيده بيك
كلنا لما بنحس بالضغوط اللى علينا بنحاول نلاقى طريقه تاخدنا بعيد
و ما فيش احلى من الانطلاق والطيران
يارب يسعدك
تحياتى

الربان يقول...

تحياتي

كلمات رقيقة و معبرة....تمنياتي لك بدوام التوفيق دائما.

تحياتي

كلام لوجيك يقول...

loumi العزيزة

انتى فعلا تستحقى كل كلمة ومن غير مجاملة
وانا زعلان انى لم اتعرف على مدونتك قبل فترة كافية

وزي ما وعدتك ادينى جيت وهتلاقينى عندك باستمرار بس انتى ماتزهقيش

خالص مودتى

Shreif fahmy يقول...

http://sfahmy78.blogspot.com/2007_04_01_archive.html
منتتظر تعليقك على البوست ده

david santos يقول...

Hello, Loumi!
Thanks for you work and have a good day.


Please, it puts fhoto of Madeleine in your Bloggue

Missing Madeleine!
Madeleine, MeCann was abduted from Praia da Luz, Portugal on 03/03/07.

If you have any information, please contact Crimestoppers on
0800 555 111

Please Help

Tondo Rotondo يقول...

Best regards from Catalonia, also in the Mediterranean sea.

loumi يقول...

الربان
اشكر لك زيارتك
رديت الزياره واستفدت
من المعلومات القيمه الموجوده فى مدونتك
تحياتى

loumi يقول...

اسامه
مين ده اللى يزهق؟؟؟
انا ؟
لا يا بابا لاااااااااااااا
المدونه تحت امرك فى اى وقت
تحياتى

loumi يقول...

العزيز شريف
انا سيبتلك بوست كامل مش بس تعليق
بس يا رب يكون البوست اللى
انا علقت عليه هو المقصود
اسلوبك جميل جدا
تحياتى

loumi يقول...

ديفيد
شكرا على مجاملتك
هو انتوا لسه ما لقيتوش البنت؟
عموما انا حطيت صورتها عندى و طبعا كلنا بقينا عارفين الحكايه و يارب ترجع لحضن مامتها وباباها فى اقرب فرصه
تحياتى

loumi يقول...

tondorotondo
thank you for your regards
i visit ur blog but i din*t understant any thing
i*m realy sorry
you welcom any time.

Shreif fahmy يقول...

في البداية وبدون أدني مجاملة مني أنا في غاية الأمتنان والشكر والتقدير على أنك زورتي مدونتي المتواضعة
عندي تعليق
انا لما كتبت نص ساعة في حياة عانس كان في إعتباري أن مشكلة العنوسة تم مناقشتها من زوايا كتير قبل كده من الناحية الاقتصادية والاجتماعية ولكن في الفترة الاخيرة بدأت البنت أنها لما تكون في وظيفة كويسة مع تمتعها بجمال متوسط وطموحها الزائد نسينت ببساطة أنوثتها ونسيت أنها مخلوق لازم يحتوى من الرجل وهي نفسها بتقول أنها استسلمت ومش قادرة تكمل حياتها بالطريقة دي
شكلي طولت نبقه خالصين
على العموم مرة تانية ميرسي على زيارتك دي
وتمنياتي أن ترسو سفينة أحلامك على شواطىء أمنياتك

Shreif fahmy يقول...

أعلا بيكي دايما ويارب دايما تكوني مرتاحة عالطول
وإليكي الخبر الحصري ده هتكون مدونتك صاحبة الانفراد بيه إنتظري بوست جديد بعنوان
عفوا حبيبي ...متقدرش ومتعرفش

ياسمين يقول...

ايه يا بنتى دة
تجننى بجد
مشاعر راقية وكلام موزون وموسيقى شعر جامدة موووت

بجد تصفيق حاد يا جميلة الجميلات

loumi يقول...
أزال المؤلف هذا التعليق.
loumi يقول...

العزيز شريف
ماشى حاستنى
بس ايه حكايه ماتقدرش
ما تعرفش
هى ما دى حتفضل
ورانا ورانا؟
تحياتى

loumi يقول...

العزيزة ياسمين
مدونتى بتترج من التصفيق
كل مرة:):)
اخجلتم تواضعنا
بابقا سعيده بزيارتك
والله انت الاجمل يا قمر
تحياتى