زقزق وطار ورجعلى
ما فهمت بيقول ايه
قلت بشويش عليا
وفهمني بس جرى ايه
قال لى خلاص خلاص
دم الغلابه انداس
لحمهم أكله السمك
و أهلهم قبضوا الثمن
قلت له اهدا وقول لى
هو انت زعلان ليه؟
زعلان ليه؟
هو انت مش معانا
والاعامله مش فهمانه؟
قال لى الحقيقه تاهت
و بين الخلايق ضاعت
ممدوح وعمرو براءه
واللى مات هو السبب
و الحكومه مش غلطانه
ده الغلبان هو السبب
اصله ركب العباره
من غير ما يدى خوانه
كان لازم يبقا شاطر
سباح ماهر وقادر
يعوم على وش الميه
لو حتى عشرين ساعه
هو انت مش معانا
والا انت مش فهمانه؟
ملحوظه: للأمانه هذا الكلام من وحى ما جاء فى تعليق عمرو اديب على اغلاق ملف العباره فى مجلس الشعب
هناك 29 تعليقًا:
على قد ما اسلوب عصفورك رائع في سرد الكلمات - زي ما عودتينا- على قد ماهي طالبه معاه كلام يوجع اليومين دول باين
:)
ألا المواطن المصري بقى بكام اليومين دول يا أختشي؟
==============================
على فكرة معرفتش إمبارح الميه كانت بني ولا لأ لإن النور كان مقطوع و الدنيا كانت ضلمة و عادشي بقى ، ويك إند و بتاع
تحياتشي
زياد
معلش واضح انها ملطشه من كلله
يعنى حناخذ السنه كلها لعب والا ايه؟
شويه كده وشويه كده
و عادشى فى المعادشى
و كذلك فى ام درمان
تحياتى
و بعدين ايه السؤال الغريب ده؟
لا يقدر بثمن طبعا
على مستوى العالم
سلااااااااااااااام
حكومة
؟؟
انت بتتكلمي في السياسة
؟؟
انا معرفكيش
:)
كنت زمان فاكر ان الفلوس ممكن تجيبلي حلوي وممكن عجلة ولما كبرت عرفت انها ممكن تبنيلي بيت وتكونلي اسرة
بس مكنتش اعرف انها ممكن مع ناس تانين
تقتل وتهدم وتشتري دم البشر
مكنتش اعرف انها ممكن تكون تعاسة
وارامل وايتام حتي لو قبضوا التمن
الحكومة ماعندهاش مانع ان كل الناس تتكلم لانها اولا واخيرا بتعمل اللي هي عايزاة الا اذا تخطيت احد الخطوط الحمراء الثلاثة
ولغاية هنا وستوب
ابوست جميل بس بصراحة الكلام في موضوع العبارة بيوجع قلبي ربنا يرحم امواتنا ويصبر اهاليهم على مصابهم
عصفورك وجعلى قلبى
سعيده انك قريب منى بصورة جديده حباها
كلام سمكة القرش للغرقانين؟
ولا الحكومة للمحكومين؟
ولا المذيعة للمستمعين؟
ولا لومى للمحبين؟
ياترى أحنا اللي بنعيش الزمن ولا الزمن هو اللي بيعشنا
مساء الورد يا لومي
موضوعك جميل كالعاده
موضوع العباره دا كان جرح لقلب كل مصري يعرف معني الظلم وقله الحيله قدام جبابره السلطه وغول السيطره وحب التملك
عارفه فيه كلمه سمعتها من احد الناجين من العباره
قال انا مش عايز فلوس ولا تعويض عن حد من الي ماتوا
بس انا عايز الراجل وابنه ينزلو ساعه واحده بس في نفس الحته الي كنا فيها في البحر ومش بيليل كمان زينا لا الصبح ويعرفوا احنا حسينا بأيه
منتي الظلم ان الناس تموت من غير ديه بتدفع
ولو ادفعت بتكون مصحوبه بمن وكلام قبيح زي السكين يجرح في القلب
منتهي الجور ان السبب في كل دا عايش بره ومبسوط والغلابه الي ماتوا علشان لقمه العيش وضاعت اجزائهم في البحر وفي امعاء السمك او غرقوا ومحدش يعلاف عنهم حاجه
بجد خلاص طفح الكيل يا لومي بجد
تحياتي يا قمر
رحم الله امواتنا جميعاً
وحسبنا الله ونعم الوكيل
عصفورك عصفور وطني
اقصد بيحب بلده وموجوع من حال اهلها
مش تبع الحزب
:):):)
اسلوبك لطيف
تحياتى
و الحكومه مش غلطانه
ده الغلبان هو السبب
اصله ركب العباره
من غير ما يدى خوانه
كان لازم يبقا شاطر
سباح ماهر وقادر
يعوم على وش الميه
لو حتى عشرين ساعه
هو انت مش معانا
والا انت مش فهمانه؟
------------------------
بجد وجعت قلبى ... البلد دى مش هاتنضف ابدا
طالما احنا كدة بجد
ربنا يهدهم بقى بجد
هو السبب فعلا
ليه ساكت ليه مبيتكلمش لازم يتوجع عشان يفوق وكان نفسى يفوق منغير مايتالم
اهو فهم واتعلم
السلام عليكم
هو فعلا كلام يوجع، وألذ تعليق عليه
عنوان منشور فى جريدة المصرى اليوم ص14 يوم الحد اللى فات .." مصر تصبح أفضل لو غيرنا الشعب والحكومة "
صحيح مين الغلطان ..؟
تحياتى
السلام عليكم
الآن يا وطني أعود إليك
توصد في عيوني كل باب
لم ضقت يا وطني بنا
قد كان حلمي أن يزول الهم عني عند بابك
ورجعت كي أرتاح يوما في رحابك
وبخلت يا وطني بقبر يحتويني في ترابك
فبخلت يوما بالسكن
والآن تبخل بالكفن
ماذا أصابك يا وطن؟
ده مش كلامي .. ده كان فاروق جويدة لما العبارة السلام 95 غرقت من سنين .. وإتعادت تاني في السلام 98 .. أصل غرق الأولانية ما كانش مؤلم قوي فحبوا يعملوا حاجة أكبر
العزيز شادى
ومين قال
انى عايزاك
تعرفنى؟
:):):)
تحياتى
عادل
كل حاجه ليها ثمن
حتى الانسان
بس مين اللى يحدد الثمن
اللى بيبيع والا اللى بيشترى
تحياتى
ايه بقا نقطتين التحدى؟
سلام
العزيزة ميمى
اه الخط الاحمر ده اللى هو ديل القطه
على رأى عمرو
بس المشكله ان القطط كترت
و كل ما القطط كترت
كترت الناس اللى عايزة تمسكها
وما حدش يلوم القطه
انا باقول اهو
تحياتى
العزيزة نبيذ
ما هو واجع قلبى من الصبح
تحياتى
عزيزى....
كلام سمكة القرش للغرقانين؟
ولا الحكومة للمحكومين؟
ولا المذيعة للمستمعين؟
ولا لومى للمحبين؟
اسئلتك كترت
تحياتى
عزيزى شريف
احنا نعيش الزمن
او هو يعيشنا
اهى عيشه والسلام
تحياتى
جى جى
شكرا على مجاملتك
سعيده انك بخير
تحياتى
العزيز فان جوخ
سعيده بزيارتك
و ربنا يرحم امواتنا جميعا
ويصبر اهاليهم
تحياتى
العزيزة
نيرفانا
اه وطنى طبعا
بس وطنى عن وطنى
تفرق كتييييييييييير
تحياتى
العزيز
محمد
كل شىء وله اخر
بصراحه القصه تجنن بس متعبه
بتكتب بطريقه المهاجر
تحياتى
ضد الظلم
تفتكر
انه فهم واتعلم بجد؟
اتمنى ذلك تحياتى
اسلام
و عليكم السلام
و رحمه الله وبركاته
ماهو احنا لو غيرنا الشعب
والحكومه مش حتبقا هى دى مصر
تحياتى
العزيز احمد
اهو كله كلام بيوجع
بس مين يسمع
ولما يسمع يعنى
حيعمل ايه
حسنا الله ونعم الوكيل
تحياتى
إرسال تعليق