الأربعاء، أغسطس 8

أنا وسواقين الأسود ف أبيض

بدأت الحكايه عندما قررت النزول الى المحروسه لمقابلة صديقتي العائده فى إجازة
وإنتهت بكتابة هذه السطور وأنا فى القطار في طريق العوده
وطبعا اللى يشوفني وانا نازله ما يشوفنيش وأنا راجعه
:):):)
اول مفاجئه فى الصباح ع المحطه القطار وصل متأخر ساعه
عادي الحمد لله إنه ما إتأخرش اكثر من كده!!!
لما وصلنا محطه رمسيس
خرمت ودني كلمه سائح ألمانى بيؤكد على قيمه الوقت فى بلدنا
هروبا من الزحمه ركبت المترو لحد سراي القبه
ومنها كان اول لقاء بيني وبين اول سواق
  • أخر مكرم عبيد؟
  • أخره؟
  • أيوة
  • حتاخد كام؟
  • اللى تدفعيه
  • لا انت تقول يا اوافق يا خلاص

بريزه وعشان خاطرك بس

ركبت لانى كنت مقدرة المشوار ما يزيدش عن كده والراجل عايز يقنعني ان المشوار ما يقلش عن 13جنيه

ما علينا

فى هذا اليوم لم اضطر للتعامل مع اى سائق تاني

اليوم الثانى اول سائق راجل كبير

  • العباسيه عمر أفندي؟
  • إتفضلي
  • حضرتك حتاخد كام؟
  • قال مبتسماً ميّه ينفع ؟

ركبت وإديته اللى فيه النصيب والراجل حمد ربنا على رزقه

المشوارالمهم بقا واللي قال عملت فيها حويطه وسألت من مكرم عبيد لفيصل المشوار بكام

قالوا لي ما بين خمسه وعشرين ل خمسه وثلاثين وانت وحظك

شاورت لتاكسي

فيصل؟

إتفضلي

كام؟

قال مصطلح ما فهمتوش بس إتضح فيما بعد إن معناه خمسه وعشرون:)

و فرحت طبعا مش عشان المبلغ اللي طلبه وانما عشان رضي يوصلني

شفتوا اخرتها سعاده لمجرد انك تلاقي سواق يوافق يوصلك

ما علينا

بيني وبينكم ابتديت اتضايق من حكايه المقاوله مع كل سواق قبل ما اركب

ليه ما يبقاش فيه تعريفه مقبوله للكل بدل الخناقات اللي بتحصل بين الطرفين غالبا

ثالث يوم الصبح

وقفت انادى واقول ميدان لبنان؟

ولا حد راضي يعبرنى وخيل لي للحظه

أنني أطلب منهم الذهاب الى ارض المعركه او ان مخيم نهر البارد قد تم نقله الى هناك

المهم اضطريت اطلع على اول الشارع واركب اول تاكسى يقف

من غير مقاوله بقا واللى يحصل يحصل

دول ما كانوش يومين

وصلت المكان المطلوب وطلّعت للراجل عشرين جنيه على اساس ان المشوار ما ياخدش

اكثر من سبع ثمن جنيهات بصيت لقيته مطلع لي خمستين وراسى بقا والف سيف

إزاي ده المشوار ما يزيدش عن سبعه جنيه وابتديت ازعق

راح مطلع لى اتنين جنيه وقال لى انا برضه الحق عليا

ابن الّذين00000

و من بعدها ركبت مرتين بس كنت وصلت لمرحله من الأعياء والإنهاك من كتر المناهده

والاكيد ان الاتنين اخدوا مني اكتر بكتير من الأجرة الحقيقيه

طبعا ابناء مصر المحروسه ما بيتنقلوش بهذه الوسيله فى كل المشاوير

وإذا كانوا كذلك فربنا يكون فى عونهم

ملحوظه:فى طريق العوده كتبت اكثر من عشرصفحات عن هذه الرحله لأنها الأولى من بعد ما إبتديت تدوين

هناك 43 تعليقًا:

اسكندراني اوي يقول...

هههههههههههه

مرحبا بكي في قاهره المعز
والله وماليكي عليا يمين
انا مابنزلش القاهره الا للشديد القوي قوي قوي يعني
وعموما في اختراع اسمه الميكروباص
بس نصيحه لا داعي للتعامل معاه لانه مالم جدا
بجد مغامره حلوه

شمعة أمـــــل يقول...

طبعا احنا كمقهورين قصدى كقاهرين بنتاسفلك على كل ده بس الموضوع بقى بالنسبه لينا عادى لاننا اتعودنا عليه لان السواقيين بيدلعوا علينا
نورتى القاهره

gohayna يقول...

بصي بقي

مهما حصلك ميجيش جنبي حاجه
انا يا بنتي ساكنه في مصر الجديده وايام ما كنت لسه صغيره بقي وفي الكليه

يااااه ايام كبرنا والله يا لمي

المهم نرجع لمرجعونا يا بنتي


كليتي في الجيزه جامعه القاهره حضرتك

وطبعا وسيله الموصلات لن محدش كان بيوافق اخد العربيه عشان خايفين عليا لاني مجنونه وانا بسوق

كانت اما المترو
او C T A

او التاكسي

وطبعا التاكسي كان مستحيل عشان محدش بيرضي يروح بدري كدا ويتزنق علي كبري الجامعه

فبتالي كان المترو او التاني
عايزه اقولك ان المترو كان عباره عن علبه لعجن البني ادمين

عارفه لما ييجي وانتي علي المحطه وتلاقي وش لازق علي الازاز بتاع الباب من كتر الزحمه مش عارف يعدل دماغه

ولا نص واحد بره والنص التاني الناسماسكينه لايقع

حاجه ليها العجب والله
والحمد لله الواحد كان بيركب برضه

بندخل في كامل اناقتنا
ونخرج منه تقريبا مبدلين هدومنا مع الي جنبنا ا وناقص ايد او رجل
واخده بوكس
مش مهم المهم اوصل والحق مواعيد السكاشن

مرمطه وربنا واخر بهدله

ياما جريت ورا
C T A
انا مره اتجننت لما فاتني شاورتله وموقفش

اخدت تاكسي وطاردته لغايه ما وقفته وركبت برضه ما انا رخمه اصلي بصراحه
هههههههههههه
ومن يوميها اتربي وبقي يستناني

العين الحمر بنتفع برضه

الحمد لله

انتي من يومين وكتبتي بوست
انا كان بقالي في الهم دا خمس سنين لغايه ما خلصت

تفتكري اكتب مجلد

ولا اعمل ايه يا لومي

وبعدين انتي نازله مصر تقابلي واحده صاحبتك برض؟
علي مين يا ماما
اطلعي من دول
وانطقي بسرعه

كنتي بتعملي ايه في المحروسه؟


سلام يا قمر

Hadota ... حدوتة يقول...

السلام عليكم
نورتى القاهرة ياستى
طب متصلتيش بيا ليه اجى بالعربية الشيروكى بتاعتى اوديكى مشاويرك
قال يعنى انا عندى شيروكى
ههههههههههههه


ياستى قلبك ابيض
متزعليش

اهو دا حال البلد
بس انا مبسمحش لحد انه يستكردنى
ولا بتقاولا ولا بتاع

انا اى تاكسى بركبه بديله حتة بخمسة وان بجح معايا بطلعله جنيه وربع كمان
وخلاص


تحياتى ليكى

عدى النهار يقول...

بس إنتى ماوصفتيش شكل التاكسيات عامل إزاى

طبعاً سليمة ونظيفة وزى الهباب

حمد الله على السلامة

غير معرف يقول...

هتعملى ايه حكم القومى وياريته بيريح فى الاخر ده بهدلة كمان
وهى دى مصر المحروسة اهلا بيكى فيها تانسى وتتبهدلى

loumi يقول...

هههههههههه
اختراع الميكروباص بقا ده
ما ينفعش معايا
انا ممكن اخد المشوار مشى بس ما اركبش الإختراع ده
ده موت يعني
دى الناس يا جدع بتبقا راكبه على حجر بعض
إيه النصيحه دى؟
شكلك بتعزنى قوى
بس كويس انك لحقت التعليق
بإنه مؤلم جداً

loumi يقول...

مصر دى امي
وما فيش داعي للاسف
انتوا بتبقوا عارفين المشوار يستاهل كام عشان كده يمكن الموضوع يكون اسهل ولو انى شايفاه برضه صعب
و بعدين حد يلاقي دلع وما يتدلّعش؟
:):):)
تحياتي

loumi يقول...

جي جي
إيه ده أحنا طلعنا بنات منطقه واحده
ههههههههههههههههه
اصل انا باعز السواقه زى عنيا
وكان لا يمكن اقبل انى ما اروحش الكليه بالعربيه بلا يخافوا بلا ما يخافوش يعنى ما كنتش حاعمل زيك واوافق اتبهدل فى المواصلات
بس عموما الدنيا فى سوريا غير هنا خالص
فى تسعيره لكل شىء الا الملابس الجاهزه
ممكن تفاصلى وإنت وشطارتك
وانا دايما باعمل حسابي لما انزل القاهرة ان يكون معايا حد من اصحابى معاه عربيه لزوم عدم البهدله يعنى
وانجاز المشاوير فى اقل وقت ممكن
تحياتى

loumi يقول...

هههههههههههه
خللى الشيروكي للمره الجايه
انا اللى مزعلنى ان احنا ما فيش عندناقيمه للوقت ونظام السبهلله ده ما ينفعش يعني لازم يبقا فيه نظام الناس تمشى عليه
يعنى لازم ابقا عارفه ان المسافه دى تعرفتها كام عشان ما حدش ياخد اكثر من حقه وانا او اى حد ما يحسش انه انضحك عليه
بس اشك انك ممكن تروحى اى مشوار ب سته جنيه وربع
ههههههههههههههههه
الا اذا كان هو هو نفس المشوار وده يؤكد نظريتى
ان لازم يكون فيه تعريفه ثابته
تحياتي

loumi يقول...

العزيز مدحت
بصراحه تكسيات اخر شياكه
موز موز موز
يا اخى مش قادرة افهم
هو إحنا ليه مبهدلين كده فى كل حاجه
تركب التاكسى تحس انك راكب مراجيح ويا سلام لو لابس هدوم لونها فاتح
انسسسسسسسسسسسسسسى
بس احنا عندنا فى المنيا
اى مشوار بإتنين جنيه
زي تسعيره الحنطور
:):):)
وما فيش تكسي فيك يا منيا فيه اكر للشبابيك من ورا
يعنى تتجمد فى عز الشتا وتفطس فى عز الحر
ولما تطلب الاكرة من السواق يروح
مسمعك الموشح
اصل الناس
والصناعه المصريه
لان اغلبها عربيات شاهين
معلش دوشتك
بس اصل انا باحقد على الناس اللي عايشه برّه
ههههههههههههههههههههه

loumi يقول...

اشكرك على المرور
المشكله ان احنا اللى بنتساهل فى حقنا عشان كده بقا ده حالنا
تحياتي

عصفور المدينة يقول...

والله يا أختي مفتاح فهم القاهرة هو موضوع التاكسيات ولا أدري كيف يقدرونها وحتى الآن رغم طول السنين وعداد السفريات لم أكتشف ذلك السر الفرعوني

عصفور المدينة يقول...

على فكرة أنا رحت المنيا كثير واول مرة استغربت المبلغ لأن المشوار كان قصير جدا

يا مراكبي يقول...

وهي دي إسمها تاكسيات برضه؟ بلاش فضايح وقلة قيمة

فيه مليون طريقة تقدر البنوك أو الدولة تمول بيها عربيات جديدة وبفوايد مهاوده بدل علب الصفيح اللي ماشية دي

وفيه مليون طريقة تانية لإحتساب القيمة النقدية بدل الفصال والخناق وقلة الأدب

التاكسيات دي مظهر من مظاهر حضارة الدول برضه .. لكن عندنا هنا المسؤلين ساكتين ولا هاممهم الموضوع ده وطز في شكل البلد .. حاجة تكسف فعلا

horas يقول...

المصيبة ان معظم اللى مسمينها تاكسيات
علب صفيح مهكعة
وتلاقي السواق جواها ملك
وعاوز بس يشاور
والراكب ينفذ
الواحد لولا انه مؤمن ان في اله اعلى متحكم في المسأله
كان يستحيل نظريا وعمليا تقولى ان اليوم بيعدى في القاهرة
في الف الف سبب كيميائى وفيزيائى
يمنع مروره
وع العموم اهلا بيكى ف مصر

Lord_Love يقول...

والله مفيش احسن من المترو بس تختارى المعاد يعنى مش اى مترو يقف تركبى لا استنى لحد لما يجى واحد فاضى وميكنش عليه زحمه انا عملت كده لما كنت فى مصر

فى القلب يقول...

بصى يا ستى أولا مصر نورت
ثانيا الموضوع ده مش أوى معنا لأان السواق بتعامل معنا من منطلق أش يأخذ الريح من البلاط
هياخد أيه ياحسره من جيبى ماهو عارف الى فيه فبيسكت أغلب الاحيان
ثالثا السواقين فى مصر بيتعملو بأسلوب الفنادق يعنى لازم نشطب على جيب الزبون ألى جاى يتفسح عندنا قبل ما يقوم من على الطربيزه وقبل ما الموسم السياحى ينتهى
وبالرغم من شكاوى السائحين المتعدده لاحظت أن كلهم بيرجعو تانى يزورو مصر اكتر من مره
وعجبى

loumi يقول...

العزيز
عصفور المدينه
ده مش فرعونى خالص خالص
الفراعنه كانوا اكثر تقدما منا دلوقت
تحياتي

loumi يقول...

عصفور تاني
:):):)
إحنا عندنا تسعيره موحده
هى البلد كلها من اولها لاخرها
10 دقايق
تحياتي

loumi يقول...

العزيز أحمد
إيه؟؟؟
بتعيب ع التاكسيات فى مصر؟؟؟
لا لا لا ما لكش حق
:):):)
عارف لما قالوا فى مشروع تكسى العاصمه استبشرنا خير
على اساس انه محدد التسعيره بالكيلوميترات
وانك ممكن تتصل بيه فى اى وقت و أحلام طبعا كلها ذهبت أدراج الرياح

أنا مرة اتخانقت مع سواق لانى اديته 3جنيه وده كان ثمن المشوار فعلاً
وكان مصر ياخد5
المشكله الحقيقيه بالنسبه لى بقا كانت انى ما معيش غير 4 جنيه
وطبعا اديته 50 قرش بس وسيبته يضرب دماغه فى البربريز
بس كنت خايفه ينزل يجرى ورايا لما سيبته ومشيت
وجرى عديت الشارع
هههههههههههههههههه
بجد انا بابقا زعلانه جدا لما حد بيقوللى انتوا عندكم فى مصر
....و...و..و....
وطبعا انت عارف كل اللى ممكن يتقال
:(:(:(
تحياتي

loumi يقول...
أزال المؤلف هذا التعليق.
loumi يقول...

horas
اشكرك على الزياره
وعلى الترحيب بيا فى القاهرة
فعلا حدث ولا حرج انها علب صفيح مهكع
ويا سلام لما السواق يخرم ودانك بشريط لمطرب شعبي منيل
والا يصر انه يمارس حقه الطبيعى فى اذيتك بدخان سجايره
عارفه انك بتدخن :)
احنا بنتأقلم مع الظروف المحيطه بينا عشان كده كله بيعدي
تحياتي
********************************
اسلوبك فى المدونه جميل ومختلف
******************************
نصيحه
******
ما تضيعش سنينك فى كليه مش متوافقه مع تطلعاتك
تحياتي مرة اخرى

loumi يقول...

الغالي أدهم
المترو كويس لو حيوصلك للمكان اللى انت قاصده بس المترو مش بيوصل لكل المناطق
عشان كده اضطريت اركب تكسيات
و اتمنى تكون انبسطت
تحياتي

loumi يقول...

العزيزة
فى القلب
اولا منورة بأصحابها
ثانيا السواقين ممكن يتعاملوا بشكل مختلف مع الاجانب أو العرب اللى بتبقا لهجتهم مش مصريه او طريقه لبسهم مميزاهم
بس فى حالتى لا ينطبق هذا الكلام
وانا فاكره ان قبل زياده البنزين الاخرانيه المشوار كان من العباسيه لرمسيس ما بيزيدش عن 3 جنيه بس فى يوم الزياده بقا 5 جنيه على طول
طول ما ما فيش اساس تقوم عليه الاجرة حتفضل المشكله قائمه
سواء معايا او معاك او مع اى ضيف على البلد
وبجد العرب والاجانب بيخرجوا من بلدنا عندهم انطباع وحش جدا ان إحنا بنضحك عليهم وبنستغلهم وده صحيح بنسبه كبيره
إحنا عايزين نشجع السياحه وبنطفش الناس بكل الوسائل الممكنه وغير الممكنه
طيب حاقولك على حاجه
برج القاهره مغلق للصيانه
ولا تعلييييييييييييييييييييييييييق
تحياتي

mimi يقول...

الغالية لومي
حمد لله على سلامتك
اولا تحمدي ربنا ان القطر اتاخر ساعة واحدة لانه ممكن يتاخر 3 ساعات حصلت معايا في الشتاء في الفجر وفي عز الصيف
ثانيا اتمنى يكون التكييف في القطر شغال لانهم بيعملوا حركات مش ولابد اليومين دول
ثالثا ركبتي القطر قبل ما يغلي ولا على التسعيرة الجديدة؟
رابعا لو مكنتيش نزلتي مصر من فترة فاكيد كل المشاوير فيها زيادة واللي لاحضته انها زادت بمقدار التلت يعني ابو 15 بقى بعشرين الصيف ده
اخيرا هقولك انا بعمل ايه ومتقوليش ان انا هبلة
انا بركب التاكسي زي الباشا
ولما اوصل اقولة حضرتك تؤمر بكام يقوم يقول اروح مديالة اللي هو عاوزة
شفتي اسهل واهبل من كده
تحياتي وطولت عليكي

احساس لسه حى يقول...

عزيزتى
الدنيا اتلغبطت ومحدش بقا عارف مين اللى مظوم الشارى ولا المشترى
السواق ولا الراكب
كله فى طاحونة اسمها الغلا وزى السكارى بيطوحوا من الغلا
من الاخر لازم نعزر اى حد دلوقتى بيجرى ورا الجنيه ربنا يعين الجميع
سلام

Hannoda يقول...

ظاهرة غريبة يا ليمو فعلا.. عارفة هي ايه؟؟

الإستغلال اللي الناس ده فارضينه
فيه سواقين هنا في إسكندرية بنفس الإسلوب.. بس مش عارفين ياخدوا راحتهم قوي عشان البلد صغيرة و مشاويرها صغيرة

بس ما سلمتش من الإستغلال و خصوصا إني لسة ما استوعبتش فرق الأسعار من السنة اللي فاتت للسنة ده

وفيه ناس.. قلييييلة قوي
بديلهم العشرة جنيه يرجعوهالي فكة كاملة و أنا اللي أقرر الأجرة

ساعتها بدعيلهم في سري و بدعي لأبناء مصر كلها إن الضغط ما يخلهومش يحللوا الاستغلال

شاب نفسة يحقق حلمة يقول...

ههههههههههههه
هما دول السواقين
اال انتي فاكره ايه
هههههههههه
كويس ان هو قالك قبل متركبي كان ممكن يقولك اللي تدفعيه ولما تدفعي يقولك لا متفقناش علي كده
تحياتي ليكي

الهادي كملاوي يقول...

بصراحة عشت مع قصة رحلتك واتخيلت راكب ونازل التاكسي .. لكن بدون شك سائقي التاكسي دائماً ما يعتمدون على الضربة الاسمها ( ما بنختلف أو جيب العندك أو البتقدر عليه) .. وهنا يتورط ضيوف المدينة ، أو الناس الجايين من السفر وبالتالي السائقين يصطادون ضرباتهم القوية بالبارد ..

و القادم....أجمل يقول...

يا ربنا

كان الله في عون اللي عايشين هناك

بصي القاهرة يوم منزلتها بنات خالتي

كانوا بيوصلوني

:(

لازم عربية

اهيئ اهيء

:(


-------------------

بس اديكي غيرتي جو

:D

loumi يقول...

الغاليه ميمى
الله يسلمك يا قمر
انا يا ستي من اول الناس اللى اتطبقت عليهم تسعيره القطار الجديده
وانا برضه حمدت ربنا انه ما اتاخرش اكثر من كده
والتكييف كان ساقع وما بقيتش لاقيه حاجه اتدفا بيها
ههههههههههههههههههههههه
بس احسن ما يكون عطلان
يعنى مش ممكن تكون فى حاجه ماشيه صح
و باحب عارفه انا حادفع كام عشان ما احسش انه ضحك عليا
ههههههههههههههههههه
قال يعنى واعيه ومفتحه قوى
انت تطولي زى ما انت عايزة
بيتك ومطرحك
سلام يا جميله

loumi يقول...

العزيز حسام
الغلا مش مبرر للاستغلال والسرقه
وربنا بيرزق بالحلال مش بالطرق التانيه
تحياتي

loumi يقول...

هنوده الإنسانه
الناس أشكال وألوان
وبما ان السواقين دول ناس ففيهم الطيب الامير وفيهم الاستغلالى وغيره من النفسيات والصفات
وكل واحد بياخد مقابل ما بيدي
تمنياتي
باجازة ما فيهاش غير القليل من الإستغلال
لانه شر لا بد منه
تحياتي يا قمر

loumi يقول...

العزيز طارق
لا انا اللى كنت باتفق قبل ما اركب
عشان ما يحصلش الموقف المحرج ده فى الاخر لما اوصل
تحياتي

loumi يقول...

الاخ زين
اهلا وسهلا بك
اه طبعا السواقين ليهم اساليبهم
وإحنا برضه لينا أساليبنا
بس لو كان يبقا فى نظام كانت المعاناه تخف شويه
تحياتي

loumi يقول...

ولاءالعزيزة
طبعا لازم عربيه
بس الظروف بقا حكمت
سعيده بزيارتك
سلام يا قمر

hosnysoliman يقول...

لومى العزيز
دول كلهم تلات ايام..الله يكون فى عون اهل مصر حتى اللى عندهم شروكى ولا حتى المرسيدس المكيفة..المشكلة مش مشكلة التكسيات دى مشكلة الزحمة والخنقة اللى ناس عايشه فيها..خانقة اصابت الناس ببلادة الحس وكره حياة الشارع..الشوارع فى مصر اصبحت ادوات لتعذيب الناس سواء الماشى منهم ام الراكب..
العزيزة لومى..امل فى زيارتك القادمة ان اكون فى خدمتك والمشاركة معك فى هذه المعاناه ودى والله ما هياش عزومة مركبيه لا والله بكل الصدق

أسوور يقول...

طب تصدقى بقى
انا زعلانة جدا منك انك جيتى القاهرة وما كلمتنيش ولا اتقابلنا

بجد زعلانة
وعايزة حد يصالحنى بقى

loumi يقول...

العزيز استاذ حسني
لا شك ان الزحام والضجيج اداه من ادوات التعذيب
و ما اكثرها فى أيامنا هذه
بس برضه ده مش مبرر للاستغلال
وغياب الدوله عن تنظيم ابسط الامور فى الشارع المصري
غيرنا مش احسن مننا
اشكرك لهذه العزومه
تحياتي

loumi يقول...

العزيزة
ياسمين
ولا تزعلي خالص
بس انا عارفه انك ما كنتيش فى القاهرة
ده اللى فهمته منك
عموما انا نازله يوم الخميس الجاى ان شاء الله
جهزى القهوه وانا جايه اصالحك
ولو مش حتبقى موجوده قولي لي
تحياتي يا قمر

غير معرف يقول...

إنتي بتتكلمي في يومين.. أنا بقى عشت التجربة دي في شهر .. والبهدلة مش دوبل لأ تريبل في وجود أطفال وأمهات كبيرة في السن ..ويا ريتها بتيجي على المقاولة..لأ.. دول لازم يحسسوكي طول الطريق إنك السبب في معاناتهم وإنك شريكة المقاول ابن ال .. اللي عمل بلاعات الشوارع وإنك مؤكد موالسة مع المحافظ في تكسير الصرف الصحي وحفر الحفر.. توصلي وانت عندك الأنا مدمرة وشعور البرانويا مسيطر عليكي..

بس سيبك انتي..نورتي مصر

loumi يقول...

ههههههههههه
الحقيقه
إن انت اللي نورت مصر
تحياتي