الجمعة، نوفمبر 2

يا قلبي يا كتاكيت

زينات في زمانها قالت
يا قلبي يا كتاكت
يا ما أنت شايف و ساكت
والناس هتفت وقالت
في ناس م الضحك ماتت
وعم زمان السكات
ومرّت علينا سنين وايام
وقالوا لنا جه وقت الكلام
الكل جاب ورقه وقلم
وبدأ يكتب حكايات ألم
عن ناس جعانه عطشانه
وناس حفيانه عريانه
ناس في سجون محبوسه
وناس بالجن ملبوسه
الكلام ما عجبش ناس
وقالوا ما فيش إحساس
ده كلام ناس ماجورة
ومش حاسه بالخطورة
ياعم دماغك
خطورة إيه ومأجورة مين
ده الكل في الهم متلازمين
وظهرت أقلام ضد أقلام
وأتسنت قوانين ولا في الأحلام
وتاهت الكلمه بين الإتنين
وإتلخبطت بينهم كل القوانين
أتارينا بنكتب بقلم مكسور
على لوح خشب باينه مسحور
زيزي كانت في زمانها حكيمه
ونرجع نقول زي ما قالت
يا قلبي يا كتاكت
ياما انت شايف وساكت

هناك 52 تعليقًا:

كلام لوجيك يقول...

صباح الخيرات
ازيك؟؟
بقالى كتير ماجتش هنا بس غصب عنى
لكن اللى انا ملاحظه ان كتاباتك بدأت تتخذ الجانب الغامق من الحياة

كل حاجه اتغيرت فى زماننا ولم يستطع اي شيء ان يقف فى وجه التغيير الا اللى بالى بالك
:)
وللاسف ان كل التغييرات الى حصلت وحدثت فى من حولنا لم يكن اي منها تغييرا للافضل او للاحسن
هقول ايه بس

خالص مودتى

loumi يقول...

صباح الأنوار
الحمد لله كويسه
حمدلله على سلامتك
ولا يهمك عذرك معاك


ما هو يوم فاتح وسنه غامقه
ههههههههههههههه

ما هو اللي بالي بالك
ده مصفح ما فيش حاجه مأثره فيه
مش حنقول غير
إن غداً لناظره لقريب

تحياتي

خيرالدين يقول...

المشكله ان الناس مش حاسه باى حاجه من اللى بيجرى حواليها
اغلبها علشان محدش يزعل
ولسان حالهم
خلاص هتنزل المره دى
عبدالفتاح القصرى

كلماتك معبره جدا
وسعدت بالمرور هنا

klmat يقول...

عزيزتى لومى
كالعاده دايما بتغزلى
بكلام جميل وموزون
ودمه خفيف
رغم قوه المعنى وقسوته
وبتشرحى العله
الناس كلها قلبها مليان
وساكت من الخوف من الاعتقال
والبلطجه بس كل ليل وله اخر
وكلنا بنقول زى زينات
بوست جامد
تحياتى لك

البرديــــــة المصرية يقول...

تصوير مبسط وجميل للمهزلة اللى حاصلة
بس دى مرحلة وبتعدى
يعنى امبارح كنا ساكتين
النهاردة بنتكلم
بكره اكيد حنتحرك
حياة الشعوب بتتغير ببطء وممكن على اجيال , مش زى حياة الفرد الواحد

المهم ما يرجعش القلب كتاكت
ولا حد تانى يفضل ساكت

اسكندراني اوي يقول...

كتاكيتو بني

ده المعنى المضحك
اما المبكي اللي كتبتيه الواحد تعب منه
حاجات كتييييير حوالينا بتدفعنا للبكاء والصراخ
واه يااااااااااااني

Unknown يقول...

هم يضحك هم يبكى

المشكلة اننا مشوفناش ولا يوم
من ايام الناس اللى ماتت مالضحك

تحياتى يا لومى

على باب الله يقول...

أيه الكلام الجامد ده ؟؟

خواطر لذيذة قوي بجد

loumi يقول...

العزيز أحمد
أهلاً وسهلاً بك
ما هي الناس ملهيه بالجري ورا لقمة العيش
أغلبها عشان ما حدش يزعل
زي إنت ما قلت
زالشويه اللي شايفين بيتكلموا على قد ما يقدروا
يقوم يطلع ناس تشكهم بلاغات وينشرخ القلم وشويه شويه ينكسر


أشكرك
يا عبد الفتاح
:):):)
قصدي يا احمد
تحياتي

loumi يقول...

العزيزة أميره
أشكرك
وأشكر كلماتك الرقيقه دائما
بأسعد بتواجدك الدائم
تحياتي وتقديري
الدائم لك

loumi يقول...

العزيز صاحب البرديه
صدقت
فحياة الشعوب تتغير ببطء شديد قياسا لحياة الأفراد
يمكن التغيير يحصل على زمن أولادنا أو أحفادنا الله أعلم
ويا رب ما نرجع نسكت أبداً

تحياتي

loumi يقول...

العزيز إسكندراني قوي


ما هو هم يضحك
وهم يبكي


وحسبنا الله ونعم الوكيل
تحياتي

loumi يقول...

العزيز
اللي فاهم كل حاجه


ده نوع من انواع التعذيب
إن حد يزغزغ حد لحد ما يموت من الضحك
ربنا ما يوريك


تحياتي لك

loumi يقول...

العزيز
على باب الله

ربنا يخليك

تحياتي

كراكيب عادل يقول...

بيتك بيتك بيتك بيتك

كتكوت ولسة مبقاش ديك وبيكاكي

مفكر نور الفجر لاح

اتهد يا منيل احنا لسة

لم يدركنا الصباح

خليك ساكت

رحــــيـل يقول...

بوست شربات بجد
دمه خفيف جدا
وتناولك للموضوع شيق
ياقلبى يا كتاكت
ياما انت شايف وساكت
رحمها الله
هل كانت تعلم ان كلماتها البسيطه ستظل عالقه فى الاذهان لتعبر عن احوالنا بعد كل هذ السنوات؟
خالص تحياتى لكى

loumi يقول...

ههههههههههههه
عادل
حسستني إني في عشة فراخ

الساكت إبتدا يتكلم
ومسيره كلامه في يوم يعلم


تحياتي

loumi يقول...

العزيزة رحيل

أوقات بيبقا لازم نغلف المواضيع الجاده والقاسيه نوعاً ما بغطاء مرح عشان نقدر نتوازن

الله يرحمها
من أهم شخصيات السينما المصريه

سعيده بمرورك
تحياتي

عين فى الجنة يقول...

طبعا زينات صدقى اظرف من مثلت دور بنت البلد المصرية وهى من اطلق اللوجو الشهير
كتاكيتو بنى
بوست لطيف وظريف وعميق وفلسفى فيه الشيء ونقيضه
برافو عليكى
احيكى

غير معرف يقول...

بجد روعه وقصيده من صميم الواقع المؤلم الى احنا عايشينه تحياتى

عدى النهار يقول...

مافتكرش الكلام عن الجعانين والعطشانين والحافيين والمحبوسين بيزعج حد.. ده بفرض إن حد بيقرأ

هم همهم كله فى الكلام اللي إنتى ماقلتهوش

الربان يقول...

تحياتي

كلام جميل و نظم بديع...ينم عن موهبة
و المهم أيضا ان المضمون جيد و يعبر عن
حالة شعب مطحون و مهموم.

تحياتي و تمنياتي بكل التوفيق.

حسن مشالي يقول...

ايه الكلام الجميل دا
متناسق ومعبر عن احوالنا

رائعة دائما

تحيـــــــــاتى

يا مراكبي يقول...

طيب سمعتي دي؟ لسة وصلاني من مصر طازة

عشان انت مصرى


عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

احمد فؤاد نجم

محمد حمدي يقول...

بجد انتى موهوبه جدا

لحكيلك حكايتى .. انا انسان مش بحب الشعر .. لا بحب اقراه ولا بحب اكتبه , ودة لعيب عدم تذوق منى مش عيب الشعر طبعا . .بالتالى لما اى شىء شعرى اقراه ويأثر فيا بعتبرة عبقرى لانى مش بتذوق الشعر وهو فرض نفسه على حاسه تذوقى

رجاء شخصى ياريت نتعرف شخصيا .. وابقى بصى على مدونتى

تحياتى

loumi يقول...

عزيزي راجي

الست دى مالهاش حل
تحفه جميله والقصري
كانوا عاملين دويتو رائع

الحمد لله إنه عجبك
شكراً لكلماتك الرقيقه
تحياتي

loumi يقول...

العزيز
رئيس جمهورية نفسه

سعيده إنها عجبتك
تحياتي
يا ريس
:)

loumi يقول...

العزيز مدحت
إللي ما قلناهوش المرة دي
نقوله المرده الجايه
إقرأ قصيده
أحمد فؤاد نجم فى تعليق يا مراكبي

بس مهما نقول
هم عاملين ودن من طين وودن من عجين

تحياتي

loumi يقول...

العزيز ربان
سفينه الحريه

أشكرك على تواصلك
أرجو أن أكون دائماً
عند حسن ظنكم بي

تحياتي وتقديري

loumi يقول...

العزيز
حسن

هذا من بعض ما عندكم

تحياتي

loumi يقول...

العزيز الباشمهندس أحمد

أدى الكلام وإلا بلاش
رائع هذا الرجل

أشكرك على هذه الإضافه الرائعه


تحياتي

loumi يقول...

العزيز
محمد حمدي

شهاده أعتز بها
بأبقا سعيده فعلاً
لما أحس إن كلامي
قدر يلمس مشاعر الناس
أنا كنت زرتك من زمان خالص
وأعجبت جداً بمواضيعك التى
تدل على وعي كبير ليس غريباً
على شبابنا
وحاتابع موضوعاتك بإستمرار
ده وعد
تسرني صداقتك
أخي الكريم
عنواني البريدي
موجود في المدونه

تحياتي

islam يقول...

لومى
السلام عليكم ورحمة الله وبركاته

زينات صدقى
الله يرحمها ، كان عندها بعد نظر
ولا إحنا أساسا طول عمرنا شعبنا عنده بعد نظر ؟

وحشنى كلامك
بس مشاغل

تحياتى
السلام عليكم ورحمة الله وبركاته

فى القلب يقول...

الله يا لومى
أنتى عارفه لما بدخل على البوست

و قبل ما أقراء و ألاقيه شعر ليكى

بشعر بأثاره ممتعه أنى هقراء حاجه روعه

و عمرك ما خيبتى أحساسى أبدا

يا حساسه و مبدعه

احساس لسه حى يقول...

عزيزتى
انتى القمر ومين جارك
بجد كلامك بقه فيها كلام جواه اكتر
وبقينا كلنا كتاكيت
ومبقاش فيه اسود
الخوف بقه جوانا واتلخبط بالنفاق والتلوين والخداع
وكل يوم عمالين ننكسر وننهزم
ونتقهر فى كل شئ
تحياتى وسلامى
سلااااااام

محمد على ..هي كده يقول...

اول مرة اجى هنا


جميله مدونتك ولذيده



بجد هو ليه الناس بتعمل كده


الناس مش حاسه بحاجه خالص
كانهم فى يبتا عميقا

امتى يفوقه بقى

كفايه نوم كفاية

سندباد يقول...

ولسه ياما هانشوف
ربنا يرحمنا
كيف الحال ؟

قطوف يقول...

بوست جميل اوى
انا بحب زينات صدقى اوى
واتبسطت اوى ان حد عطيها حجمها
بس ايه الكلام اى زى الفل
بجد احيك
وارفع القبعه
واعطيها لك
برافوووووو

Hannoda يقول...

بقينا مجموعات متقسمة وكل مجموعة فوادي تاني

ناس مثقفة شاغلة نفسها بهموم الوطن.. وده الناس اللي قاطعة قلبها و عمالة تهاتي

و ناس فوق ماسكينها وواكلينها و حاطين خطط لعشرين سنة قدام.. و الي يهاتي يهاتي

و ناس مطحونين.. غلابة بس غلطانين
الغلط بجد من ساسهم لراسهم
آه مش هم اللي قالوا للي واكلينها كلوها
ولا فايدهم قوة ولا حاجة يعملوها

لكن هم اللي علموا ولادهم الفضى و التكالية وتكبير الدماغ

صدقيني
احنا اللي غلطانين أكتر منهم
لو هم خططوا لخرابها .. وبفرض ان خطتهم عشرين عام
ليه احنا ما نخططش لعمارها و تكفينا العشرين

ساعتها حايبقى عندنا اللي يهد ثرواتهم على دماغهم

وترجع لينا
خيرها فايدينا
نحبها ونراعيها و تراعينا

يا رب نتعلم

loumi يقول...

العزيز
إسلام
وعليكم السلام ورحمة الله وبركاته
فينك من زمان ما حدش شافك؟
ربنا يكرمك يارب
بصراحه أنا باموت فيها
كلامها حكم
زيها زي كثير من الناس اللي عندها بعد نظر
ربنا معاك يا رب
سلام

loumi يقول...

العزيزة أوشا
إيه يا بنت الكلام الكبير ده؟
أنا كده حأصدق وما حدش حيعرف يكلمني
:):):)
دي شهاده أعتز بيها منك يا قمر
وربنا يقدرني
يا ذات القلب الكبير
وما أخيبش إحساسك
إن شاء الله
تحياتي

loumi يقول...

العزيز أسامه
إنتوا كلكم جيراني
وربنا يديم المعروف بيننا

الأسود موجوده بس يمكن بتراقب
وتشوف لحد ما تيجي اللحظه المناسبه
لازم يفضل عندنا أمل مهما حصل
وما ضاقت إلا أما فرجت

بس التغيير محتاج وقت كبير

على فكرة أنا زرت إحساس برضه حيأول ما إتعملت بس ما عرفتش أقولك مبروك
كان عندي مشكله في النت
وقريت موضعك وإيمي
بس بصراحه طويل ما قدرتش أكمله


تحياتي

loumi يقول...

العزيز محمد على

أهلاً وسهلاً بك
الناس خلاص تعبت على الاخر
بس أكيد لازم يفضل عندنا أمل

الناس حاسه بس مش قادرين يعملوا حاجه

تحياتي

loumi يقول...

العزيز سندباد

اللهم أمين
بس برضه الأمل موجود

الحمد لله كله تمام

تحياتي

loumi يقول...

العزيز
سي السيد

الست دي فلته من فلتات الزمان
قليل لما تلاقى ناس بالعفويه والبلاغه دي الله يرحمها

أشكرك بجد
تحياتي

loumi يقول...

هنوده الإنسانه

عشان هم قله فاعله بيدها كل شىء
ونحن كثره متفرقه ليس بيدنا شىء
غير شويه الكلام
كلام بلا فعل

بس برضه حيفضل فى أمل
والتغيير محتاج سنين وسنين


طول ما في عقول ناضجه وشباب واعيه
لازم يكون في أمل

تحياتي
ياقمره

اسامة يس يقول...

جميلة الكلمات ووصفت بدقة الحالة التي نحن عليها الآن..
رائع استخدامك للجملة في البداية وختامك للخاطرة بها...
دمت بكل ود..
خالص تحياتي

loumi يقول...

العزيز
أسامه
ربنا يخليك يارب
وأشكرك علي مرورك
سعيده إن الكلام عجبك
تحياتي

Hannoda يقول...

معاك جدا ان الامل موجود

ومستني تحققه بفارغ الصبر

و بجد نفسي أعمل حاجة تقربه ولو مل

عارفة

ولا مرة ما ابتسمتش من كلمة
انسانة

ولا مرة اعتادت عليها ففقدت تأثيرها

بحبها قوي
:)

loumi يقول...

هنوده الإنسانه

أي شىء بنعمله بحب
وأمل في ربنا ورحمته وكرمه علينا
ده بيقرب الأمل شويه شويه
لينا وللي حوالينا

بس إحنا إللي دايما مستعجلين على النتايج
بس النتايج دايما بتاخد وقت عشان تطرح
زى البذره فى التربه محتاجه مراعيه جامده وصبر وتعب

بيسعدني
إني أرسم ولو بسمه
على وجوه الناس اللي حواليا
فما بالك لو كانت إنسانه زيك؟

تحياتي يا قمر

و القادم....أجمل يقول...

هيييييييه
عظمة علي عظمة

راااااااائعه جداااااا

ربنا يوفقك دايما

:)

loumi يقول...

العزيزة ولاء

يا رب تكون الإمتحانات خلصت
ها؟
إيه أخبار النتيجه؟

ربنا يوفقك يا قمر