الجمعة، يناير 18

كرسي برجلين خشب

ف قلب الزحمه دخلت
هناك ف الزاويه لمحت
كرسي برجلين خشب
جريت عليه وقعدت
غمّضت عنيّ سرحت
سافرت ف قلب الصمت
ف قاعة كبيره واسعه
منها للسما فاتحه
لقيتني فيها واقفه
أنوار من كل ناحيه
خطوه تلحقها خطوه
على صوت قلبي والنبض
ترسم لي دواير واسعه
ما لهاش أخر ولا حد
رجليّ ع الأرض دايسه
وإيديّ للسما لامسه
وروحى ماليه المكان
بألوان السما السبعه
فجأه الأصوات بتعلا
وصوت الواد ف القهوة
أجيب شاي من تاني؟
وإلا اسخن الأولاني؟
بصيت له وإبتسمت
وخدت بعضي وقمت
وحلمي ع الكرسى سِبت
وكل ما أحِنْ لُه أدور
على كرسي برجلين خشب

هناك 33 تعليقًا:

عدى النهار يقول...

جميلة الكلمات
الأحلام ممكن تأخذنا لسابع سما ودايماً فى شىء يردنا تانى للواقع.. بس كويس إن الرجوع كان مصحوب بإبتسامة

حمدالله على السلامة
:)

واحد مش فاهم حاجة يقول...

سرعة دواير

هدوء ذكرى
وساعات سكون

كحلها احاسيس حسيتها فى الكلمات

فى حالة تناقض بتقول ان مفيش تناقض

اسكندراني اوي يقول...

لا لا لا
دا الموضوع كبر اوي
ايه الجمال ده
حلم
وسرحان
وايدين ماسكه السما
الوصف والتشبيه جمال اوي
الله ينور


سؤال معلش
مين اللي حاسب على الشاي اللي ما تشربش؟
وش بيضحك
وانا طالع جري لحسن الكرسي يجي في دماغي

gohayna يقول...

القهوه يا لومي؟

القهوه؟

هيا حصلت يا بنتي


اوعي تكوني رحتي بتاعت حنان ترك

مش كنتي تعدي نحلم سوا طيب


بقالي كتير محلمتش يا بنتي

كنتي خديني في سكتك يا جميله الكويت مش بعيده


عموما ماشي

لينا قاعده تانيه مع بعض


والحساب عليكي


وايه التشبيهات الجميله دي ؟


بجد تسلم ايدك

سلام يا قمر

loumi يقول...

إحنا بنهرب من الواقع للأحلام
وكلما كانت أحلامك أبعد للتحقق
كلما علوت في السموات


عبد الرحمن الأبنودي قال:
نحلم ونحلم بالأماني المفرحه
أتاري أحلامنا بلا أجنحه

بس الحقيقه إنها رحله ممتعة
أدعوك لتجربتها
وترجع بالسلامه
:)

loumi يقول...

عزيزي إللي فاهم كل حاجه


إسود وأبيض
ليل ونهار
برد ودفا
مع كل كلمه من دول
أحاسيس مختلفه
وكلها أجمل من بعض

باسعد بتواجدك وتعليقاتك
تمنياتي لك بالتوفيق

loumi يقول...

تصدق
وأنا بأكتب
خطر في بالي إن حد حيسأل
مين دفع حساب الشااااااااااي
:):):)
يا خااااااااال
أنا زبونه دايمه
عشان كده ما بيدققوش معايا
ههههههههههههههه
وتقريبا حيسخنوه ويسقوه لزبون تاني
:)

الموضوع ده كان ماشى في سكه وإنتهى لما نُشِر عليه
سعيده إن الكلام عجبك

تحياتي يا خاااااااال
الكرسى جه في لوح الإزاز ودفعوني تمنه
هههههههههههههههههههههههههه

loumi يقول...

جي

وحشاني جداً

ما فيش أحلى من القعده على القهوة


وجصوصاً لما تقعدي في ركن بعيد وتراقبى تحركات البشر وإنفعالاتهم
متعه

إيه قهوة حنان ترك دى؟

لا ما فيش أحلى من القهاوى البلدي

في إنتظارك يا قمر

طبعاً على حسابي


الله يسلمك يا جميله

Hannoda يقول...

حاعلق على كذا حاجة
أولهم و اللي أخد إحساسي قوي هو الكرسي .. لإن شكله وهو وسط الهدوء اللي بينبئ بحاجة ده شاددني جدا

ده غير الشجر اللي أوراقه واقعة .. بحس اني منجذبة له جدا و بحب وجوده في أي صورة
===============
ف قلب الزحمه دخلت
هناك ف الزاويه لمحت
كرسي برجلين خشب
جريت عليه وقعدت
==============
أربع جمل حسسوني بحركة حقيقية وإنتماء للمكان ده اللي وسط الزحمة ورغم الزحمة فيه كرسي فاضي وكإنه مستنيني

سهولة شديده في سرد إحساس قوي جدا
يمكن تستغربي مالي معجبة جدا قوي بدول بالذات بس فعلا عشان في ثانية نقلوني لكرسي فوسك الزحمة في مجمع الكليات كنت بجري عليه و أقضي ساعات
وأحس فيهم زي اللي قولتيه:
روحى ماليه المكان
بألوان السما السبعه
فجأه الأصوات بتعلا

===============

بتقولي الكلام ده إزاي بس

:)

بحق
أشكرك

osama يقول...

الله
على هذا النبض الحاني ...
حين يكون الوجدان دافئاً .. حين تلعب المخلية دور الوسيط بين الروح والروح...
هنا وجدت نبض عازف...
دمت بكل ود..
خالص تحياتي

Ragi يقول...

كالمعتاد، لغة سلسة تنساب لتصور لحظة من لحظات السعادة وحب الطبيعة
الله ينور عليكى

loumi يقول...

هنوده الإنسانه
يا جميله
إللي بينحاز للمهمشين
لازم يتأثر بالكرسى الخشب
وورق الشجر المرمي على الأرض

لأ مش مستغره أبداً
لأن هي دي هنوده
إللي أنا عرفتها

بأغمض عنيا وأسرح
:):):)

تحياتي يا قمر

loumi يقول...

كل الإمتنان
والشكر لكلماتك
العذبه الرقيقه
التى أعجز أمامها
عن أي رد

تحياتي

loumi يقول...

العزيز راجي

بالرغم من أن الكلمات
سلسه وبسيطه فعلاً
إلا أنه من أكثر التدوينات
التى إستغرقت وقتاً لتظهر بهذه الصورة


وينور عليك

يا مراكبي يقول...

فاكرة أغنية لحنان ماضي كانت بتقول: عدى الهوا عدى .. ميل هنا وهدى؟

راجعي كلمات قصيدتك كده هتلاقيها ممكن تتغنى على نفس اللحن

جميل إن الكلمات تكون بتوحي بلحن غنائي

samo يقول...

loumi

تعرفى انت كل يوم بيظهر جزء بسيط اوى من شخصيتك من خلال كتابابتك

بس

ايه الكلام الجميل ده

كلماتك دى فكرتنى باغنيه فيها

بحلم وحلمى بسيط .. مش كتر مال ولا سيط

بحلم اكون نفسى .. يسمع غنايا الطير

واغنى غنوه ليل .. للدنيا ولنفسى


تعرفى انا قبل ما ارد على تعليقك الجميل فى مدونتى قولت لازم ارد على البوسط ده الاكتر من رائع

الحلم .. وضحتيه بكل بساطه

بكل معانى الوضوح

على كرسى خشب .. وفى وقت غريب .. يضيع الفكر ..ويظهر فى الهوا وحى .. ينادينى فى لحظه وياخدنى ..
لاجمل من الاحلام يسحبنى

زى ما اكون انا اللى حسيت الحساس ده

بس الحمد لله ما نسيتش الشاى

بجد بوست جميل وبسيط

تحياتى لافكارك وكلماتك الجميله

اكيـــــــد يقول...

البوست جميل جداً تحياتى ...
لو ممكن المرة الجاية يكون كرسى صالون اشيك ..........

أكيـــــــــــد

angelic devil يقول...

وسط كل الزحام
بحلم
وسط غدر الزمان
بحلم
وسط عيون اللئام
بحلم
في قلب بحر الحياة
بحلم
في قلب ليل معرفش منتهاه
بحلم
في عز حزني
بحلم
و في عز مجدي
بحلم
و ع رايك يا حجار
بحلم و افتح عينيا
ع جنة للانسانية
و الناس سوا بيعيشوها
بطيبة و بحسن نية

بس اهم من كل
جملة انت ابدعتيها
رجلي ع الارض دايسة
و ايدي للسما لامسة
مهم اننا نحلم
بس الاهم
ان رجلينا متفارقش الارض
عشان منفوقش ع جرح ملهوش دوا

تحياااااااتي

loumi يقول...

أيوة فاكراها
تقريباً كانت مقدمه لمسلسل
على ما أذكر
ربطت الكلمات باللحن
بس صحاني منه الواد بتاع القهوة وهو بيطرقع بالملعقه في كباية الشاي
:):):)

تحياتي

loumi يقول...

العزيز سامو

دي أغنيه لمحمد فؤاد

سعيده بعودتك ويا رب تكون نتايج إمتحاناتك زي ما إنت عايز

وربنا يوفقك

سعيده كمان إنك قدرت تحس الإحساس وتتنقل بين الأماكن

والشاي أساسي طبعاً

تحياتي لك

loumi يقول...

أكيد

أشكرك
بس لو قعدت على كرسي صالون
الكلام مش حيطلع ببساطة اللي إتكتب
حيطلع متزوق ويمكن ما يطلعش خالص
تحياتي

loumi يقول...

كلماتك جميله يا قمر

الحلم مشروع لكل الناس
وفي كل الحالات إللي
بنمر بيها لازم نحلم

في ناس بتطير مع الحلم
وناس زيي تحب تحلم بس رجليها
تفضل لامسه الأرض

وربنا يلم جراح كل إللي
بيحلموا ويطيروا
ويصحوا يلاقوا نفسهم واقعين
على الأرض
ده نصيبهم بقا

تحيااااتي
يا جميله

loumi يقول...
أزال المؤلف هذا التعليق.
عروس البحر يقول...

اسلوبك حلو اوي و فعلا الكلمات جميلة
تحياتي

princess dodo يقول...

قد يكون الكرسى متاح للجميع
لكن الاحلام ليست متاحه كذلك
للأسف
تم مصادرة الأحلام الجميلة

.
.

كلماتك فعلا رائعة


عمق محبتى

loumi يقول...

عروس البحر

أشكرك على زيارتك
تمنياتي لك بكل خير

تحياتي

loumi يقول...

رقيقتي الغاليه

كل شىء متاح

الكراسي والأحلام

أما تحقيق الأحلام فهو

غير متاح في بعض الأوقات

وربما هذا هو جمال الحلم

تحياتي يا رقيقه

Hannoda يقول...

زمانك مش عارفة واحشاني قد ايه

klmat يقول...

وحشتينى يالومى
حسيت وانا بقرأ انى قاعده فى نفس
القهوه وسرحانه وبحلم معاكى
دايما خواطرك جميله واسلوبك رائع
ربنا يخليكى وتمتعينا دايما بابداعك
تحياتى وسلامى

loumi يقول...

وإنتِ كمان واحشاني يا قمر

loumi يقول...

العزيزة جداً أميره
إنتِ كمان وحشتيني
حمدلله على سلامتك
باسعد بتعليقك دائماً
وباحس إن دايماً
في شىء مشترك بيننا
ربا يخليكِ ويسعدك
يا رب
تحياتي يا جميله

klmat يقول...

عزيزتى لومى
عارفه واللهى انتى كتبتى احساسى
بالضبظ بس انا ماكتبهوش انا فعلا
حاسه انى فى حاجه مشتركه بينا
وبفرح اوى لما بشوف تعليقك عندى
ورأيك بيهمنى جدا جدا
انا كنت فاكره ده احساسى انا بس
فرحت اوى لما لقيت نفس الاحساس عندك
ربنا يديم الشعور الجميل ده يارب
تحياتى القلبيه

loumi يقول...

ربنا يديم المعروف

ويسعدك ويخليكِ يا رب

مش بيقولوا من القلب
للقلب رسول


تحياتي