الثلاثاء، يوليو 10

عصفوري واكل دماغي

قال لي عرفتي اللي حصل؟
قلت له خير؟قول وخلص
أنا اصلي خلاص زهقانه
ومش طايقه وقرفانه
قال لى طب خدي عندك
بدر منور بضفاير
طفله وإسمها بدور
و قبل ما تاخد شهادتها
و بنجاحها تكمل فرحتها
قال إيه الوقت ازف
و زفوها للدكتورة
وهى قامت مشكورة
بعمل عمليه صغنطوطه
وضاعت يا عينى البنيه
من جرعه بنج زايده
من غلبى قلت له عادى
بقا يحصل كتير الناحيه دى
قعد يرفرف ويزعق
وقال اصلك مش فاهمه
دى عمليه ما ليها لازمه
بس لما البنيه ماتت
الدنيا قامت بس قعدت
أصل دى مش اول بدور
البدور فى بلدى كتير
وزى ما كل مصيبه تحصل
منشتتات عريضه تطلع
بس المفتى قال مشكورا
الختان حرام حرام حرام
!!!!!
السؤال
عفوا هم اكثر من سؤال
تفتكروا دى ممكن تكون اخر بدور؟
يا ترى الفتوى دى مؤثرة فى مجتمعنا؟
هل الموروثات والتقاليد اقوى ام الفتاوى والقوانين؟
هل ممكن ييجى يوم وتختفى فيه هذه العاده ؟

هناك 20 تعليقًا:

islam يقول...

السلام عليكم ورحمة الله وبركاته

لومى:
أه ليه لأ ممكن تبقى أخر بدور، لأن كل بدور فاتت كانت آخر واحدة ؟
أما موروثاتنا .. أظن إنها مش موروثات دى دم، أه فى ناس بتعمل عمليات تغيير دم .. بس كام واحد من .. الكام واحد اللى مبيغيروش..؟

لومى ياريت تخلى العصفور يطير ويعرفلنا إيه أخبار التحقيق فى غرق العبارة ... أة وفكريه بالطيارة والصنوق الأسود ... وخليه يعدى على ليبيا وإيطاليا ويعرف لنا أخبار الهجرة غير الشرعية والغرقانين

لومى ... سكتى العصفور ؟

على فكرة تركت لك تعليق عند ميمى، وشاكر على الإهتمام
تحياتى
السلام عليكم ورحمة الله وبراته

sendbad يقول...

مفيش حاجة بتبطل لوحدها لا يغير الله ما بقوم حتي يغيروا ما باتفسهم
لازم احنا الي نتغير علشان كل عادتنا الوحشة تتغير معانا

فى القلب يقول...

أأأأأأه يا جاره القمر
الهم كتير
مش عارفه هيتلم أزاى
شكرا على المكان ألى حجزتهولى
وتعالى عندى شوفى هم عصفورى

عدى النهار يقول...

قرأت مؤخراً إن أحد المسؤلين عن مكافحة الأمية صرح فى إجتماع حضرته الست مرات البيه إن مصر أمامها 200 سنة من العمل للقضاء على الأمية

أنا شخصياً شايف إن فى بلاوى كتير فى حياتنا ممكن التخلص منها أو تقليص وجودها لو فى قدر معقول من الإخلاص فى تناولها من قبل أولي الأمر

S H A H يقول...

زي ما قال عدى النهار الاميـــــــة

ده الاساس , الجهل هو اللي عامل فينا كدة, نفسي البلد يتغير كل اللي مسكينها عشان بنضبط حالنا

loumi يقول...

العزيز إسلام
وعليك السلام ورحمه الله وبركاته
للأسف عصفرى كل ما بيطير بيجيبلى أخبار ما تسر
وفى كل قضيه من اللى سألت عليهم رجع لى خرسان مش عارف يقول ايه
وحسبنا الله ونعم الوكيل
بس برضه عصفوري مش حيسكت
ماهو ما بقاش باقيلنا غيرشويه رفرفه وزقزقه
اى خدمه يا إسلام
تحياتى

loumi يقول...

العزيز سندباد
شوف لازم كل واحد فينا يعمل اللى عليه بذمه وضمير حى
لو كل انسان غير نفسه وحاول يغير اللى حواليه للاحسن اكيد أشياء كتير حتتغير
بس لازم نبتدى
تحياتى

loumi يقول...

العزيزة فى القلب
اكيد الهموم كتيره
بس دايما لازم يبقا فيه امل
حتى لو فى وقت الواحد حس ان خلاص كل حاجه بقيت سودا لازم فيه بصيص امل يخلينا نمشى لقدام ما نقفش فى مكاننا
حالا حاروح اشوف
تحياتى

loumi يقول...

العزيز عدى النهار
اصل الست مرات البيه عايشه فوووق
وباصه لنا بنظرة ايه القرف ده روحوا استحموا الاول
يا راجل دى اظن كوبا
قضت على الأميه فى سنه
طلع قراربتعطيل الجامعات لمده عام كامل
وقام كل طالب متعلم بتعليم مجموعه اميه
هى دى الناس اللى عايزة ترتقى
مش احنا اللى معطلين كل حاجه عشان الحاجه امريكا ترضى عننا وما تقطعش عننا القمح المسرطن والمعونه اللى بترجع تستردها بطرق أخرى
احنا ولاة امرنا عندهم قوانين بينفذوها
اللايحه عندهم بتقول كده
فقر/جهل/تخلف
بس دول بقا مع القهر ممكن يعملوا حاجات كتير غيرمتوقعه
تحياتى
معلش اصلى مبقوقه حبتين
:)

loumi يقول...

شوف اللى ماسكين البلد مش حيتغيروا
بس احنا ممكن نعمل حاجات كتير بمجهودات بسيطه
فى مثل بيقول
إذا كان رب البيت بالدف ضارب
فشيمه اهل البيت الرقص
وانا مش قادرة افهم طب ليه اهل البيت ما يدوروش على حاجه غير الرقص
ويسيبوا رب البيت يطبل ويزمر زى ما هو عايز؟
لأنه ببساطه شديده مش حيلاقى حد يطبله فجايز يزهق
تحياتى

mimi يقول...

لومي
معلش الرد متأخر
عصفورك عنده حق واجابة السؤال اننا لازم يكون عندنا امل ان في يوم من الايام الغمة هتنزاحوهتطلع شمس جديدة وتبقى العملية دي من التاريخ نفتكرها ونقول ياااه شوف زمان كانوا بيعملوا حاجات متخلفة ازاي
معلش خيالية شوية بس بحب ابص للنص المليان من الكباية علشان اشوف الدنيا احلى
تحياتي يا عسل

Xee يقول...

لومي

موروثاتنا و تقاليدنا و عاداتنا للأسف معظم الوقت بتكون أقوى بكتير من القوانين و الفتاوي
حتى معتقداتنا الدينية و ممارساتها، لو فكرنا هنلاقيها مترسخة فينا كانها عادات و تقاليد
و الفأس الوحيده القادرة على تكسير أصنام العادات و الموروثات المسممة هي محو الأمية ، و عدم تهميش المجتمعات خارج المدن الكبيرة بصورة تجبرها على الانغلاق على نفسها و تكوين قوانين عرفية خاصة بها، زي ما بيحصل في سينا

تحياتي

loumi يقول...

الغاليه ميمى
ولا متاخر ولا حاجه
انا زيك برضه دايما عندى امل
لان الحياه من غيرامل ما يبقالهاش معنى
بس طول ما فى ناس عايزة تدفن راسها فى الرمل وما تشوفش الحقيقه اللى واضحه زى الشمس حيفضل عندنا مشكله
عارفه مامه بدور دى لما سألوها بعد البنت ما ماتت قالت انا مش عارفه اذا كانت العمليه دى لازم تتعمل والا لأ
جهل وتخلف
وهى دى الناس اللى بيسهل اقناعها بأشياء غير صحيحه بالمرة.
تحياتى يا قمر

loumi يقول...

زيىىىىىىىىىىىىىىىىىىىىى
عارف اوقات بافكر لو حصل تجريم لهذه العمليه يا ترى حتخف؟
والا الناس برضه حتلجا لبدايل اخرى
بس قلت طول ما الناس معتقده بان دى حاجه لازم تتعمل حيعملوها
عشان كده لازم تغير ثقافه شعب بحاله
تعلمه وتوعيه
الراجل لو فهم ان عاده زى دى كفيله بانها تهدم اسر بحالها ما كانش يقف ورا العاده البشعه دى وينادى بيها
كأن الست لوحدها هى المسؤوله وهو لا حول له ولا قوة
ههههههههههههه
سلام

كراكيب عادل يقول...

تحيا العدل

:)

loumi يقول...

العزيز عادل
هههههههههههههه

Hannoda يقول...

وضيفي لبدور البنوتة الطفلة اللي لسة شايفنها في برنامج معتز

طفلة شايلة طفلة و الإسم .. أمها

عندها 11 سنة و وأُغتصبت.. و حملت و وولدت و صدرها إتنفخ باللبن في جسم أضعف من القصبة وعلى قمته وجه إتمسحت منه البراءة

ربنا يحمي أطفالنا من عمايلنا

لكن بالنسبة لسؤالك الأخير يا لومي

فأنا متأكده إن الظاهرة ده حاتنتهي.. أصل البلد بتتغر.. الناس بدأت تتحرك من توابيتها و تفوق و تعرف إنهم ناس

صدقيني حانتغيّر

اسكندراني اوي يقول...

حتفضل دي عادتنا المهببه اللي مش حتتغير

وبكره نلاقي بدور اخرى بس الكره دي مش جرعه بنج زياده
لا حتلاقي الدايه هي اللي ما عرفتش تكمل المدبحه صح

وساعتها حنشوف دار الافتا حتعمل ايه

loumi يقول...

العزيزة هنوده
للاسف إنى ما شفتش الحلقه دى بس حد حكالى عليها بجد شىء بشع بجد
بس نرجع ونقول الاهل بيبقوا فين لما حاجه زى دى بتحصل؟واكيد البنت دى فى زييها كتير طالما ما بقاش فى وازع دينى وبالتالى الضماير ماتت وكل شىء بقا مباح
بجد ربنا يسترعلى اولادنا ويبعتلهم ايام احسن من دى ايام
اما التغير فده اكيد دوام الحال من المحال
بس ثمن التغيير ده من دم بناتنا وصحتهم
واجسامهم وربنا عنده العفو والمقدرة
تحياتى يا انسانه
بجد بتوحشينى

loumi يقول...

العزير اسكندراني قوى
الحل مش فى دار الافتاء الحل فى العقول اللى لازم تعرف ان دى جريمه فى حق المجتمع باكمله
تحياتى لك