الخميس، يوليو 12

سمعونا زغروده

حبّة عين امه م الغربه راجع
شايل في قلبه حبّة مواجع
حالف ما يرجع وإيده فاضيه
حيفرح جيرانه ومامته ناديه
كل البيوت مفتوحه
قدام عريسنا الحيله
ما هو راجع محمل
وللشقه حيكمّل
م الإبره للدش جايب
و عربيه جمرك راكب
وبناتنا تجري تتذوّق
ده عريسنا أصله متسربع
وهوب زغاريد وكوشه وزفه
وعلى طول تسافر المحروسه
شهرين إتنين وتلقى
تليفون من كل حته
يا ماما مش مبسوطه
وف أول أجازه تنزل
فى إيدها ورقتها
وع الكتف عيّلها
وسمعونا بقا زغروده

هناك 18 تعليقًا:

mimi يقول...

شوفتي الشطارة بقى لحقت اول تعليق
ههههههههههههه
كلامك جميل يا لومي والله دي مأساةانت عارفة الشاب بيبقى مش قادر يرتبط علشان الامكانيات وبيسافر عشان كده ولما بتتوفر بيبقى متسربع عايز يخطف اي عروسة حلوة ويطير والبنت بتعاني ان كل اللي بيتقدم مش جاهز والاهل مش هيرموا بنتهم ولما يظهر الفارس اللي مش ناقصة حاجة مش بيلاقوا سبب للرفض ومش بيبقى في وقت يعرفوا بعض غير لما يلاقوا نفسهم بقوا لوحدهم في بلاد الغربة ويتصدموا بالواقع المرير انهم ما يعرفوش بعض
والله ما انا عارفة مين الضحية ومين الجاني لو عرفتي يا ريت تقوليلي
سلامي يا عسل

loumi يقول...

الغاليه ميمى
شطورة هههههههههه
كلامك كله صحيح
و بيؤكد ان الإتنين ضحيه الوضع الإقتصادي السيء اللى الكل بيعانى منه
عارفه ابسط حقوق الانسان فى اى دوله إنها توفر له عيشه كريمه بيت ووظيفه وتعليم وصحه فين بقا اى حاجه من دول؟؟
طبعا ما فيش
وبالتالى كل ما ترتب على خطأ فهو بالضرورة خطأ
الزواج لازم يبقا قائم على اسس مش اخطف وإجرى زى ما بيحصل من كام سنه والنتايج واضحه للكل0
احنا الضحيه واللى مش هممهم حالنا هم الجناه
وإن غدا لناظره لقريب0
تحياتى يا قمر

اسكندراني اوي يقول...

المشكله ان البنات متسربعه والصبيان متسربعه كله عاوز يتجوز
محدش فكر ان الاتنين ممكن ما يصلحوش لبعض

وكمان العريس لما بيكون جاهز ومن الره للدش جايب
يبقى الرفض صعب

لومي
بوستك جميل
وواااااااااقعي جدااااا

تحياتي

loumi يقول...

العزيز اسكندراني قوي
الواقع هو الأصل فى الأشياء
وزى ما قلت كله متسربع
ما فيش وعى لا عند الشباب ولا البنات
ولا الاهل كمان
باسمع جمله غريبه جدا
عايزين نسترها ونخلص
زى ما تكون هم عايزين يخلصوا منه
بجد ربنا يسامح اللى كانوا السبب وحسبنا الله ونعم الوكيل
تحياتى

hosnysoliman يقول...

الاستاذه المحترمة الدكتوره صاحبة المواهب المخزونة..اجمل حاجة احساسك باالواقع وتعبيرك عنه واضح ان الحدوته انت عايشتها بشكل او اخر..لكن التناول رائع كل موهبة فطريه جميله..المهم انت رائعة

Xee يقول...

لومي العزيزة

مش هعلق على القهر الاقتصادي اللي بيخلي ولاد بلدنا يسيبوها عشان يدورو على لقمة العيش، و لا هتكلم على الثمن الباهظ جدا للغربة، و لا على مأساة اي بنت اهلها بيجوزوها بمنطق اقتصادي بحت
انا بس هعلق على حاجة واحدة اهم من كل ده

بقى شهرين وراجعة بعيل على كتفها يا مفترية؟؟؟
ههههههههههههههههههه

لييييييييييه؟؟ الباشا مين بالظبط؟
ههههههههههههههههههههه

تحياتي

bocycat يقول...

للأسف هو ده اللى بيحصل البنت مبقاش فى دماغها غير الغريس الجاهز ده غير انها بقى حتسافر برة وتشوف دنيا تانية .. مش مهم تعرف طبعه ولا اخلاقه ولا حتى تحبه كله حييجى بعد الجواز .. والنتيجة زى ما قلتى اولاد عايشين فى بيوت مشتتة .. ربنا يستر والله دى الحرية اجدع بكتيييييير .. تحياتى

عدى النهار يقول...

هو عدم التوفيق شىء وارد حتى لو توفرت كل علامات النجاح. مثلاً بنت عمرو موسى وإبن أشرف مروان إيه اللي ممكن يؤدى بهم للطلاق.. يبدو إن بعد الجواز بتظهر طباع شخصية كانت مدفونة وكل طرف ورغبته أو مقدرته على التأقلم بيحدد التوفيق من عدمه

loumi يقول...

العزيز
استاذ حسنى
يسعدنى اهتمامك وتعليقاتك
و ربنا يخليك لينا
بجد الحدوته بتبتدى مع موسم الصيف وعوده المتغربين
والباقى كما ذكرته فعلا
تحياتى

loumi يقول...

العزيز طحن زىىىىىىىىىىى
انا مفتريه يا شرّاني؟
ههههههههههههههههه
بس بجد ضحكتنى وانا يقالي كتييييييير ما ضحكتش
يا فندم التليفونات هى اللى ابتدت تهل بعد شهرين وفى اول أجازة ودى ما تقبقاش قبل سنه بأى حال من الاحوال تنزل وعلى كتفها عيلها
هو عموما ابن البطه السودا
تحياتى
اديك قرّيت وما رحناش الحفله
سلااااااام

loumi يقول...

العزيزة
bocycat
ما فيش شك ان الحياه الناجحه محتاجه حد ادنى من كل شىء بس لازم يكون فيه توازن بين كل الاشياء عشان الحياه تنجح والاهم ان تستمر0
البعض بيدخل فى مشروع الزواج زيه زى اى مشروع يا نجح يا فشل
بس للاسف مش بيبصوا لثمرة هذه الشركه وما سيلحق بها من ضرر فى حال فض الشركه
تحياتى لك

loumi يقول...

العزيز عدى النهار
طبعا عدم التوفيق وارد فى اى علاقه
وغالبا لو الاساس غير سليم
وفى الجوازات الصيفيه الموسميه دى بتبقا الاسس السليمه مش متوفره بالمرة
اما عن ابنه عمرو موسى وابن اشرف مروان فاعتقد ان الناس دى جوازاتها برضه تخضع لاسس غير سليمه برضه
لانها ربما تكون قائمه على فكرة تزاوج السلطه والمال و هو ما نشاهده فى هذه الطبقات بكثره
يعني في الحالتين ما فيش اسس سليمه
ولا شك ان الزواج يكشف اشياء كثيره
لا تكون ظاهرة قبل ذلك
لك تحياتى

شاب نفسه يحقق حلمه يقول...

لولولولولوللولوي
ايه رايك في الزغروده دي
هههههههههههه
بجد كلامك حلو اوي
تحياتي ليكي
طارق الزمالكاوي

sendbad يقول...

لاننا فاهمين معني الزواج غلط الشاب فاهمه ان عروسة حلوة يمسكها في ايديه ومش مشكلة الاحساس ولا الاحتياجات النفسية
واالبنت عايزة الكوشة والفستان الابيض ومش مقدرة يعني ايه مسئولية بيت واولاد ورغبات واحتياجات زوج
مشكورة علي مجهودك

كراكيب عادل يقول...

تستاهل كانوا داخلين علي طمع

:)

loumi يقول...

العزيز
طارق الزملكاوى
تسلم على الزغروده اللى سمعت الجيران وجيران الجيران
لنا كنت حابعتلك رزمه اوراق ومجموعه اقلام بس لقيت ناس سبقتنى
تحياتى

loumi يقول...

العزيز سندباد
لا شك ان فى جزء مش فاهم الزواج غير زى ما انت قلت
وما ننساش الوضع العام اللى بقا فيه خلط لكل الامور
ما بقاش فى حاجه واضحه0
تحياتى

loumi يقول...

العزيز عادل
ههههههههههه
بس هو مين اللى راح يخطبها مش هو اللى راح؟
مين بقا الطماع؟
الاساس كله غلط فى غلط
الجواز مش شويه فلوس وعربيه وشقه وكوشه وزفه وزغاريد
دى حياه وعمر محتاج تفاهم وموده ورحمه
ولو هى طماعه يبقا هو كمان طماع
الطمع مش بس فى الفلوس
وإلا ايه؟؟؟
تحياتى