الجمعة، أغسطس 24

يا فرحه ما تمت خدها الغراب وطار

فاكرها يا عيني زيّه واحده من الثوار
حلم معاها بكل أحلام الأحرار
وإكتشف فجأه إنه كان مجرد حوار
يا فرحه ما تمت خدها الغراب وطار
*****
جالي غاضب و ثاير على حافة لإنهيار
يعيد ويزيد ويحكي على كل اللي صار
مسكت بالعافيه نفسي من قبل الإنفجار
عايزه أصرخ و أقول له إنت البعيد حمار
*****
تطير وتعلى تعلى وتنزل على ما فيش
وتدخل قصور وتطلع.. بس منتوف الريش
ترجع للعشه تاني تدور على لقمة عيش
لا طولت ا للقمة إنت ولا حتى دقت ياميش
*****
بص ع اللي واقفالك هناك ورا الأسوار
عينيها عليك ما نزلت من قبل يوم الحصار
قوّي نفسك بيها وإمشوا في عز النهار
وإوعى ف يوم تضعف او ييجي يوم تنهار

هناك 54 تعليقًا:

اسكندراني اوي يقول...

ليه كده خييييييير في ايه

loumi يقول...

ايه يا عم انت واقف ورا الباب؟
هههههههههههههههههههههههههههههههه

Xee يقول...

ههههههههههههههههههههههههه
هههههههههههههههه

و الله كنت داخل أعلق زي البني ادمين، لقيت الحوار اللي فوق ده

ههههههههههههه
و الله انتو الاتنين عسل
:)

rack-yourminds يقول...

اعذريني لم استوعب كلماتك

تحياتي لكي

شاب نفسة يحقق حلمة يقول...

سامحيني
انا مفهمتش حاجه
تحياتي ليكي

اسكندراني اوي يقول...

ههههههههههههههههه
لومي
اه واقف ورا الباب حتى قبل ما تكتبي البوست شفتي بقى

و القادم....أجمل يقول...

بس أنا عاجبني الكلام أووووووي

انا متهيألي المعني يعني و الله اعلم

انه واحد بيبص لبره

و مش مقدر النعمة اللي ادامه

;)

كده صح و لا ايه ؟؟

بس الصراحه عجبني الكلام اوووووي

التناسق رائع

تحياتي لكي

:)

islam يقول...

لومى
السلام عليكم

يبدو أن عصفورك الأن يبحث عن وليف
ويبدو أنه كالكثيرين يزهد فيما فى يديه ويبحث عن ما هو فى علم الغيب
بكره يتعلم

السلام عليكم

Hannoda يقول...

كالعاده انت و عصفورك.. كلامكم نقاش.. وساعات خناق.. وساعات مناجاه

بسدايما يوجه

ودايما بيسمع

بس انت عاوزاه يعمل ايه بسيا لومي
على قد قدراته بيثور و يرفض و يتجرك

ماهياللي واقفاله بقوتها اللي تغلب ضعفين قوته

أصله راح ولاجه عصفور
ماحلتوش غير ريش و جناح
ومنقارما ينفعش يمسك غير الفتافيت

هو فيه حيل يهد السور؟؟
ربنا يهونها عليه و علينا

ولو حاولنا ندور على الحمارحانتوه و نتلخبط و نتجرح

ربنا يحميه بسمن الإنهيار

بس عندي سؤال يهنيبجد

هي (عائده على مين؟)

والنبي قوليلي عشان أنا بدعاوزة أعرفمين هي اللي تقصديها

harmless يقول...

ايه الزمن الاغبر ده
المنهار بقى حمار ومش عارف ده
والطيب مستنى خير عمره ما جه
يا لومى لا تلومى المغفل ده
شاف مهلبيه وكان نفسه لحسه من ده
ولما يأس صبر وقال
اللى راح راح واللى جه جه

أسوور يقول...

زيه يا لومى زى أى راجل حمار

:))))

تحياتى

يا مراكبي يقول...

كتير بيحصل إن الإنسان تكون سعادته بين إيديه ويروح يدور عليها في مكان تاني

ربنا ينور بصيرتنا جميعا

horas يقول...

رباعيات
غاية في القوة
تحياتى

loumi يقول...

العزيز زييييييييييييي
لا لا لا لا لا
لو سمحت ارجع علق زي البني ادمين
هههههههههههههههههههه
فى انتظار تعليقك
:):):)
حد يروح برضه اديس ابابا؟
تحياتي

loumi يقول...

العزيز
wahed
ولا يهمك
حاول تقراها تاني
تحياتي

loumi يقول...

العزيز طارق
مسامحاك طبعا
برضه حاول تقراها تاني
ويمكن التعليقات تساعدك
تحياتي

loumi يقول...

العزيز اسكندراني قوي
هههههههههههههههههههه
ماشى يا عم
بس ما فيناش من خض اصل نجمي خفيف
:):):)
المهم يا عم فين التعليق؟
بصراحه اصل البوست ده
كان حاله
سيرياليه جدا
ولولا الوالده لحقتني في اخر لحظه
كنتوا شفتوا العجب
تحياتي

loumi يقول...

ولاء العزيزة
ربنا يخليكي يا رب
ايوة كده ممكن
عموما
هو كلام مقصود منه
إن كل واحد يفهم زي ما هو عايز
لذيذه الصورة الجديده
تحياتي
يا قمر

عدى النهار يقول...

أول ما قرأت العنوان تصورت الموضوع عن الخبر اللي للأسف طلع إشاعة
:(

على كل حال عصفورك لسه بخير وتحيا الوحدة العربية

loumi يقول...

العزيز إسلام
إيه الغيبه دي؟
يا رب تكون بخير
سعيده لانك لسه فاكر عصفوري
اه طبعاً الايام كفيله بانها تعلمه
بس يا رب يتعلم
وعليكم السلام ورحمة الله وبركاته

loumi يقول...

هنوده الإنسانه
بجد بجد بجد
البوست ده كانت حاله
ما تعرفي غيظ
ثورة داخليه
ضيق من شىء ما
وعلى فكرة
انا نزلت البوست بعد تعديل جامد جداً
لانه كان لوحه سيرياليه
انا بس اللي كنت شايفاها
وعشان ما احيركمش معايا عدلت وحذفت منه لحد ما بقا بالصورة دي
بس هو زى ما تقولي صرخه من جوايا فى وش حد بيبص لحاجه مش بتاعته
سواء بقا كانوا اشخاص او دول
هو معنى اكثر منه حد محدد
يعني ليه دايما فى ناس عايزة اكثر مما
تستاهل
انت اخذتي الموضوع بمفهومه السياسي
وده فعلا جزء من البوست
وينفع حد تاني يشوفه من
منطلق إجتماعي
زي اللوحه يعني
كل واحد يفهمها زى ما هو عايز
تحياتي يا انسانه
يا رب اكون جاوبتك
وما كونش توهتك

loumi يقول...

عزيزي....
من جهة زمن اخبر فهو كذلك
ويمكن رأيي فيه إنه حمار لذلك
واللي مستني الخير مسيره يوم حيجيه
وساعتها من فرحه حيقول
راح اللي راح وجالي إللى كنت مستنيه
جميله قوي
نصر المهروسه
تحياتي

loumi يقول...

العزيزة ياسمين
بس الحمار بقاله سنين جارر العربيه
:):):)
وربنا يستر والاشاعه ما تطلعش هى
:):):)
انت عارفه طبعاً اني ضد إطلاق الصفات بشكل عام

بس عموما من صفات الحمار انه صبور وحمول جدا
هو بس مشكلته الوحيده ان صوته من انكر الأصوات
:):)
تحياتي

loumi يقول...

العزيز احمد
يسمع منك ربنا

إيدتين مرفوعين للسما

ويا رب تكونوا إستقريتوا
عشان مدارس الاولاد
تحياتي لك و للاسرة الكريمه

loumi يقول...

العزيز
horas
اشكرك
تحياتي

loumi يقول...

العزيز مدحت
معلش يا إشاعه ما تمت
:):):)
بس الغريب ان انا ما جبتش سيرة عصفوري المرة دى
:):)
هو خلاص بقا ماركه مسجله؟
هههههههههههه

mimi يقول...

لومي الغالية
معلهش مشغولة جدا الايام دي
بس كلامك جميل وعندنا في مصر وبمناسبة القواميس اللي دايرة اليومين دول بنقول على الاخ اللي بتتكلمي عنه
زي القرع بيمد لبره
تحياتي واسفة على التأخير

loumi يقول...

الغاليه ميمي
وحشتيني
وربنا يطمنني عليك دايماً
ههههههههههههه
القرع لما استوى قال للخيار يا لوبيا
حبيبتي ربنا معاكي
ولا داعي للاسف
المهم انك بخير
تحياتي يا جميله

Unknown يقول...

العيب مش فى عصفورك

العيب فى الاسوار
كل ما يعدى سور

يطلعلة الف سور

فى القلب يقول...

أى حد معاه نعمه
ووقفه مستنيه الباشا
وبتتفرج عليه وهو بيعمل مغامراته
وبعدين يستعمى ويعمل مش شايف


تبقى هيه ألى حم....ألى وقفه تستنى الراجل ده

Diyaa' يقول...

لول @ واقف ورا الباب
ومحاولتك لكتابة الشعر كهواية جميلة وأتمني إنك تستمري
لكن...ليه خدها الغراب وطار
مش ممكن هو اللي رماها ؟!

S H A H يقول...

بونسوار

ايه بس البوستات الجامدة دي احنا مش قد كدة

حبينا نسلم كمان

و الدوق فليد زعلان منك


سلام مؤقت

No Fear يقول...

السلام عليكم
Loumi
أولا أنا أتشرفت بزيارتك للمدونة بتاعتي و ياريت متكنش أخر مرة بس ياريت تقوليلي الأغنية اللي أنت حاطهها دي أسمها أية و أنزلها منين
معلش هأتعبك معايا بس هي روعة الحقيقة

Hannoda يقول...

لا ما تهتش يا لومي.. بالعكس قريت البوست تاني بوضوح أكتر .. وحطيت جواه خلفياتي الخاصة و ثرت معاك على شخصيات في مجال حياتي أنا
اصلى بحب قويالحاجات اللي بتيجي علىمقاس كل القلوب و العقول

زي أغاني فيروز ومنير

تحياتي

احساس لسه حى يقول...

عزيزتى
ايه الحكم دى والمعانى الجامده
دى سياسه بقه
وتحريض وحاجات كتير
يلا ربنا يوقفلك ولاد الحلال
سلام

samo يقول...

جميل التعبير

كلام ممكن كل واحد يفهمه على حسب حالته هو
سواء كان ولد ولا بنت

حبيب ولا عدو

على العموم دى اول مره ليا وبجد اسلوب غريب بس ممتع

اتمنى زيارتك لمدونتى لان الاسلوب متشابه

No Fear يقول...

السلام عليكم
أزيك أخبارك أية؟
خلاص متشغليش بالك أنا جبت النشيد

kafrawy يقول...

وإوعى ف يوم تضعف او ييجي يوم تنهار




جميل اوى

Hisham Anwer يقول...

جميله جدا المدونه

بعدين الغراب ده محدش عارف يصطاده ولا ايه

لو حد يعرف يجماعه ميترديتش في زيارتي

شكرا جدا للكلمات يا
loumi

loumi يقول...

العزيز فاهم كل حاجه
جايز
:):)
تحياتي

loumi يقول...

العزيزة اوشا
:)
تحياتي

loumi يقول...

العزيز ضياء
شكرا على رد الزياره
ممكن برضه
:)
تحياتي

loumi يقول...

شاه
بونسوارين
لا قول لدوق فليد ما يزعلش
مبروك على اللوك الجديد للمدونه
والف سلامه
وعوداً حميداً يا كابتن
تحياتي

loumi يقول...

العزيز محمد
انا باعتذر لك على التأخير وسعيده انك قدرت تحصل على الأغنيه
تحياتي

loumi يقول...

هنوده الإنسانه
بابقا سعيده قوي لما باحس إن حد قدر يلاقي لكلامي صدى فى حياته
وده مش جديد عليك يا قمر
ها؟ايه اخبار اسكندريه؟
ربنا يسعدك
تحياتي

loumi يقول...

العزيز حسام
اشكرك
انت فين
مش باين ؟
تمنياتي لك بالتوفيق

loumi يقول...

العزيز سامو
اشكرك على الزياره
فعلا هو كلام ينفع اى حد يفهمه ويفصله على قده
تحياتي

loumi يقول...

العزيز محمد
تاني مرة
الاغنيه لطفله فلسطينيه
والاغنيه اسمها رايه بيضا
تحياتي

loumi يقول...

العزيز كفراوي
سعيده بزيارتك
مدونتك جميله
تحياتي لك

loumi يقول...

العزيز هشام انور
اهلين وسهلين بيك
فى عالم التدوين
بس ده كلام؟
من اولها
إختبارات كده؟
:):):)
تحياتي

gohayna يقول...

الحاجه لومي

مساء الورد يا قشطه


ايه الاخبار

واخبار الحمار ايه يا بنتي

مش عارفه اهو ايه الي حصل

اللدنيا قلبت نهيق وبرسيم اترمي في كل حته


ههههههههههه

والله دا طبع الانسان تبقي في ايده ويبص علي غيرها ولما تتضيع منه

يقعد يعيط زي العيال

ربنا يهدينا جميعا يا بنتي


تسلم ايدك يا معلمي

سلام يا سكر

loumi يقول...

العزيزة
جي جي
والله يا بنتي ضحكتيني
بقا البرسيم اترمى فى كل حته؟
هههههههههههههههههههه
اخبارك ايه يا قمر؟
وحشتيني
يا قمر

DARK يقول...

جميلة روحك فى البوست ده يالومى
يسلموا

loumi يقول...

الله يسلمك يا حبيبتي
تحياتي