الثلاثاء، يونيو 19

لا تراهن على انوثتى

كلما احسست انني برءت من حبك
جئت تذكرني بما كان ,سرا وجهارا
لا تراهن على انوثتي فأنت خاسر
سأشهر فى وجهك اسلحه دماري الشامل
لن يستطيع حبك قهري واضعافي
فأنا الاقوى بضعفي مهما تدور الدوائر
ترى من حقك مثنى وثلاث ورباع
وانا لا اقبل ان اكون احداهن
فأنا انانيه لا أقبل فى حبي شريكا
لا انكر عليك حقك الالهي
فلا تنكر علي حقي الفطري
فعقلي يرفض ان يتنازل لك عن قلبي
شغلت جزءا منه وتبقى باقى الاجزاء
فى انتظار من يحسن شغل الاثنين معا
فلا تراهن على انوثتي فانت خاسر

هناك 46 تعليقًا:

Gid-Do - جدو يقول...

ياسلام عليكى يالومى لما تكتبى شعر ـ بفتح الشين ـ
جئت تذكرني بما كان سرا وجهارا
سؤال برئ ـ ممكن توضحى ما كان سرا
سأشهر فى وجهك اسلحه دماري الشامل
سؤال برئ ـ هل للامعاء صلة بهذة الاسلحة
ترى من حقك مثنى وثلاث ورباع
سؤال برئ ـ هو البعيد مجنون
فلا تنكر علي حقي الفطري
سؤال برئ ـ اذا انت بتقولى حقى فطير زعلانة لية لمل كلوا
فلا تراهن على انوثتي فانت خاسر
انوثتى دة حصان خسران ضيع ناس كتير رهنت عليه
-----
فينك يازياد
-----
لولاك يالسانى
ما اتلسعت ياقفايا
-----
تحياتى وشكرا لسؤالك عنى ـ

loumi يقول...

يا سلام عليك يا جدو
لما تكون اول تعليق ازغرد يا ناس؟
كل اسئلتك بريئه يا عينى ههههههههه
امعاء ايه يا جدو؟
اهه انت قصدك....
ههههههههههههه
والله اتفتقدت تعليقاتك اليومين اللى فاتوا دول0
وحمدلله على سلامتك يا جدو ياغالى
زياد هايص واحنا لايصين
تحياتى ومرة تانيه حمد لله على سلامتك

.:.-=- ELGaZaLy-=-.:. يقول...

فأنا الاقوى بضعفي مهما تدور الدوائر
ترى من حقك مثنى وثلاث ورباع
وانا لا اقبل ان اكون احداهن

همممممممممممممممممممممم

مش عارف حاسس واقعية اوى الخاطرة دى ..

loumi يقول...

محمد
ازيك
الاول مبروك على نهايه القصه
ومستنيه انك تنشرها فى كتاب
الكتابه يمتزج فيها الواقع بالخيال دائما
تحياتى لقلمك يا مهاجر

Shreif fahmy يقول...

مش عارف بعد ماقريت البوست بتاعك حسيت أني لازم أقولك أسمعي قصيدة كن صديقي
للمتوهجة دائما
السيدة ماجدة الرومي

وعاوز اعرف سيادتك ممتنعة عن التعليق ليه عقاب ده ان شاء الله

loumi يقول...

انا باحب الاغنيه دى قوى
بأحس انها بتعبر عنى فى اوقات كتير
لماذا تهتم بشكلى
ولا تهتم بعقلى
كن صديقى
من اكتر الكلمات اللى باحس انها بتهمنى
اما عن حكايه الامتناع عن التعليق فهو غتاته
ههههههههههه
بصراحه الجزء ده جميل جدا
و تفصيل المشاعر اللى فيه مسنى قوى
انا حسيت انى ريهام بس ده كان زمان
دلوقت اتغيرت الدنيا
علمتنى
حاجات كتير
فى انتظار الجزء الثالث
ويا رب يارب يكون الاخير
تصدق انا بطلت اتفرج على مسلسلات
ما اقدرش استنى
هههههههههههه
تحياتى

يا مراكبي يقول...

الحق الإلهي الذي منحه الله للرجل .. والحق الفطري الذي خلق الله المرأه عليه

موضوع محير جدا ومحل نقاش حتى آخر العمر

لكن القصيدة بجد جميلة ولا تخلو من واقعية (وش بيغمز) وكمان تعليق جدو جميل جدا .. كان نفسي تجاوبي على أسئلته (وش بيغمز جامد جدا) .. تحياتي

عصفور المدينة يقول...

المفروض الرهان الحقيقي يكون على العقل فعلا

قاسم أفندي يقول...

حلوة

عدى النهار يقول...

أولاً: ربنا يخللي للسما نجومها ويبارك لها فيهم ويخللي للنجوم سماهم ويبارك لهم فيها

ثانياً: قرأت البوست الصبح وكان هناك تعليق جدو فقط. الحق تعليقه لخبطنى شوية:) المهم جيت تانى وقرأت البوست مرة أخرى و لمست فيه ما عجبنى فعلاً من وضوح الفكرة والخصوصية الشديدة فى التعبير عنها بصدق وبساطة جميلة

bocycat يقول...

حلوة لاتراهن على انوثتى فأنت خاسر .. انا بقى بقول يراهن زى ما هو عايز هو الخسران لأنه حيسلم بسهولة ومش حيقدر يقاوم .. هاهاهاها .. وانا معاك لا اقبل ان اكون من ضمن المثنى والثلاث والرباع .. عشان انا انانية فى حبى ومحبش شريك خاااااااالص .. تحياتى

loumi يقول...

جدو يا جدو
يا اعظم جد
بعد ما قريت تعليقك الصبح
قمت بادخال تعديل بسيط
وهو وضع فاصله بعد كلمه ماكان
قبل كلمه سرا وجهارا
فأصبح
جئت تذكرنى بما كان ,سرا وجهارا
التذكره هى اللى سرا وجهارا
يا جدو يا غالى
عشان يا جدو ما حصلش حاجه لا سرا ولا جهارا(وش بيغمز
على رأى احمد
تحياتى

loumi يقول...

الباشمهندس احمد
وش بيغمز
المشكله الازليه بين الحق الالهى والحق الفطرى بسبب اختلاف القوانين الوضعيه عن القوانين الالهيه
وتمسكنا بالاعراف بعيدا عن الشرع الالهى
وده عملنا نوع من الازدواجيه
وش بيغمز جامد
الاجابات على اسئله جدو
ما كان سرا هو انى كتبت الكلام ده فى الضلمه عشان ما حدش يسمع:)
اسلحه الدمار الشامل ليس لها علاقه باى جزء من اجزاء الجهاز الهضمى:)
ترى من حقك مثنى و........
هو البعيد مش مجنون
بس بيدافع عن حقه الالهى
اما الفطير
فهو اتاكل واتهضم وراح مطرح ما راح:)
ههههههههههههههههههههههههههه
تحياتى

loumi يقول...

عصفور المدينه
الرهان على العقل افضل
ولكن للقلوب احكام قد لا يقدر عليها العقل
تحياتى

loumi يقول...

قاسم افندى
اشكرك
تحياتى

loumi يقول...

العزيز
عدى النهار
اولا
السما والنجوم بيشكروك على تمنياتك لينا بالبركه والبركه حلت بزيارتك
ثانيا انا نفسى لما جيت لقيت تعليق جدو عرفت انى غلطت لما ما حطيتش فاصله بعد كلمه ماكان
قبل سرا وجهارا
عشان كده عدلت واضفت هذه الفاصله
يمكن ده اللى خلاك لما جيت مرة تانيه
وقريت المعنى اتغير شويه
مش عارفه
بس انا حسيت انه كده بقا مدى المعنى اللى انا قصدته
ثالثا اشكرك على كلماتك البسيطه المعبره
تحياتى

loumi يقول...

العزيزة
bocycat
ههههههههههههه
بتعجبنى الثقه بالنفس دى
ويا رب ما يجيب خسارة ابدا
تحياتى

بياترتس يقول...

انا مش عارفه اقولك ايه
بس تفتكرى من صفات الانوثه
انها تنحى النظر عن العشق لمجرد انها هتكون واحده من اربعه
انا مش هأنكر ان البنات دايما بتحب تكون هى السيده وفقط فى حياة جوزها
بس مش دايما بتلاقى اللى هى عايزاه
الموضوع ده مش حاد بالمنطق اللى انتى اتكلمتى عنه
الموضوع ليه جوانب كتيره جدا ومنها ان مفيش مساواه ابدا ولا يمكن تكون بين الرجل والمرأه
ربنا فضلها فى حاجات وفضله فى حاجات
واعطاه ميزة الزواج المتعدد واعطانا ميزة الجنه التى تنظر الأم
بلاش دايما نخلى الحب أعمى والانانيه كمان عمياء
وطبعا الاختلاف فى الرأى لا يفسد للود قضيه
ولا ايه؟

بياترتس يقول...

وده مش معناه ان بتغاضى عن شرط المنساواه فى التعامل بيهم
بالعكس ده الاساسا فى التعدد وخيفة الخطيئه طبعا

loumi يقول...

بياتريس
اهلين وسهلين
طبعا اول حاجه عملتها بعد قراءة تعليقك انى زرت عالمك الخاص جدا
جميل جدا جدا
كلام قليل
يحمل الكثير والكثير
سبت تعليق على بوست وجيت اسيب التانى
هوب
مين قطع النور؟
طبعا التعليق اكلته الظلمه
هههههههههههه
لا شك ان الانوثه مرتبطه ارتباط وثيق بالعشق والهوى
فعندما تعشق الانثى تفيض بمشاعر جميله تغمر كل من حولها بلا استثناء
ولا بد ان نفرق بين الحب والزواج
فالاول قائم على المشاعر بدون تدخل العقل
والثاتى الاساس فيه العقل
وانا مع حريه ان يختار كل انسان ما يناسبه
ولست ضد
اى وضع يختاره جميع الاطراف بشرط ان يكون فيه احساس بأدميه كل طرف
ارجو ان اكون وضحت وخهه نظرى
وسعيده بمعرفتك
تحياتى

عدى النهار يقول...

لومى

أنا فعلاً فى المرة الثانية لاحظت إن الفاصلة كانت مضافة بس ماكنتش متأكد أوى. هى مؤكد فرقت كتير

تحياتى لكِ

loumi يقول...

عدى النهار
ملاحظه دقيقه
تحياتى

Shreif fahmy يقول...

حصريا لمدونة نحن والقمر جيران
بعد إنتهائي من كتابة الجزء الثالث
هتكون مجموعة أجزاء يوميات محتار في السنترال جاهزة للنشر تباعا أيه رايك بقه في الخبطة الصحفية دي

gohayna يقول...

الحق الالهي
والحق الفطري

كتير بيراهنوا علي امتلاك المشاعر لفرض رغبات هما الي بيستفيدوا منها

وبينسوا او يتناسوا عمدا حق المرأه في تفردها وتربعها علي عرش قلب حبيبها

دايما تطلع اسطوانه مش حرام دا حلال

وبينسوا الشروط والواجبات الي تبيح التعدد

لا بيبصولها بمنظور واحد
والباقي الغي

تفتكري العيب فيهم ولا في المنظور؟
هههههههههههههههههه

تسلم ايدك يا لومي

قويه مووووووت

تحياتي

Gid-Do - جدو يقول...

لومى

انا بمر المرة دية هنا مش علشان اكتب تعليق
ولكن بمر علشان اقول الف شكر على مرورك
عندى وكتابة كلامتين اسعدونى فى مرضى
دة جميل فوق راسى وابسط شئ لرد جزء بسيط
من هذا الجميل انى اجى لغايه هنا واقول ...شكرا

اشكر كل محاولاتك للاطمئنان عنى وقد ابلغتنى زوجتى بهذة المحاولات ـ وهذا اكتر مما استحق عاجز عن شكرك

loumi يقول...

العزيز شريف
رأيي ان خبطتين فى الراس توجه
هههههههههههههههههه
تحياتى

loumi يقول...

اهلا يا جي جي
شوفى
عشان انت مش بتحبى كلمه بصى
ههههههههههههههههه
العلاقه بين الرجل والمرأه ازليه
وكل طرف من حقه ان يرى ما يشاء
ويحدد الشروط التى يريدها وعلى الطرف الاخر ان يقبل او يرفض
الاسس الشرعيه لا جدال فيها
اما المنظور فهو يختلف من شخص لاخر سواء كان رجل او امرأه بحسب المجتمع والعادات التى تربى عليها
وكم من عادات واعتقادات خاطئه تحكم مجتمعاتنا
سؤال برىء
اذا اراد شخص ان يتزوج امرأه اخرى
وصارح زوجته الاولى وقبلت هل هناك اى ضرر سيلحق باى طرف من الاطراف؟
هل يستطيع احد ان يخطؤه؟
ولكن اذا رفضت عليه ان يلتزم بقرارها
ومن يتق الله يجعل له مخرجا
اذا اتق الانسان الله
ذكرا كان او انثى
وفقه الله لما يحب ويرضى
تحياتى يا قمر واعتذر لتاخرى فى زيارتك بس ملحوقه
سلام

sendbad يقول...

مع احترامي واعجابي بالبوست وقوة معانيه والثقة الرائعة اللي فيه
انما احنا ليه دايما بنحاول ندخل نغمة التحدي في علاقة الحب الجميلة انا بحب واللي بحبه بيحبني يبقي ليه يكون في تحدي واثبات مين الاقوي والاكبر والاكتر والاطول والحاجات دي ، اه ممكن يكون في تحدي لو في بعد او فراق او حتي خيانة انما طالما العلاقة سوية يبقي الاتنين في مرتبة واحدة متساوية مفيش راجل يقدر يعيش من غير ست حتي لو قال غير كده ولا ست تقدر تعيش من غير راجل حتي لو قالت غير كده او بمعي اصح واوضح مفيش حد يقدر يعيش من غير حب خاصة اذا كانت المشاعر صادقة
ده راي والله اعلم يمكن اكون رومانسي شوية او شويتين انما ده راي
تحياتي

loumi يقول...

العزيز سندباد
بس ده انت طلعت من اسيوط مش من بغداد
اولا اهلين وسهلين بيك
وشكرا على زيارتك
اذا احب الطرفين بنفس القوة والتساوى والاهتمام فلا مشكله على الاطلاق فانا اتفق معك فى ذلك الحب مشاعر جميله بين طرفين
اما اذا كانت مشاعر احد الاطراف اقوى واهتمامه اكبر فهنا لا بد ان يحدث خلل
فيحس الطرف الاكثر اهتماما ان الطرف الاخر ربما لم يعد يحبه ويبدا الشك فى عاطفه الطرف الاخر نحوه وتبدأ سلسله من المشاكل وغالبا ما ينتهى او يخنق هذا الحب بيد الطرفين ايضا
اكيد البوست ده حاله خاصه
وتحياتى

harmless يقول...

الحب بعد ماكان موده ورحمه وتآلف وانسجام وتوحد واندماج

بعد ما كان بيذيب الـ أنا ويخلق الـ نحن

وبعد ما كل طرف كان بيسعد بالخير للطرف التانى كانه له وبيتمنى النجاح للتانى ويعتبره نجاح له

وبعد ما كانت كل الكلمات المتبادله اخلاص وتفانى واقتناع وايمان

دلوقتى بقى الكلام تحدى واستنفار وتوعد وتهديد ووعيد وتيأييس وكسر عين

الكلام بقى ما تقدرش وحترجع وورينا واعمل اللى تقدر عليه وما تتحدنيش وماتراهنش وحتشوف وحتركع وحاذلك وحاكسر عينك وانت صنف مش حاسس بالنعمه وانا وانت والزمن طويل

جرى ايه يا اهل الهوى
حصل ايه يا محبين
ايه اللى صابكم يا عاشقين

هو الحب بقى منافسه ولا مصارعه ولا ملاكمه ولا ترابيزة قمار ولا ايه؟

بنوتة من وسط البلد يقول...

Loumi
ما شاء الله عجبنى اوى احساسك
وصورتيلي المشهد وانتى بتتكلمى بمنتهى القوة والاباء والمحروس زى الخروف قصادك :)

بجد احساسك رائع
وكلماتك منتقاة وقوية

بس مش عارفة ليه لما قلتى اسلحة دمار شامل افتكرت صدام حسين :)

loumi يقول...

عزيزى....
لا الحب مش كسر عين ولا كسر اى حاجه خالص
واهل الهوى موجودين
بس مش كل المحبين اللى بيعرفوا يحافظوا عليه ويحموه
دايما بتسعدنى بتعليقك
تحياتى

loumi يقول...

بنوته من وسط البلد
سعيده بزيارتك
وبأن كلامى عجبك
ومووتت على روحى من الضحك
من حكايه الخروف يا عينى
اما حكايه اسلحه الدمار الشامل
فهى الاسم الحركى للخطه رقم 11 من كتاب
ازاى تطفشى حبيب---------------------------
ههههههههههههههههه
اصل الجو الايام دى كله اسلحه ودمار وربنا يستر
تحياتى
يا بنوته

mimi يقول...

معاك في كل كلمة قلبا وقالبا التعدد شرعه الله لاسباب مش لمجرد التعدد
بتقولي لو واحد اخد رأي زوجته ووافقت يبقى مفيش مشكلة
لأ ده في مشكلة كبيرة لان رأيي اللي تقبل ان واحدةتشاركها في جوزها تبقى مش بتحبه او تكون ست مش طبيعية لأن
ده ضد الفطرة زي ما قلتي
مش كده ولا ايييييييييييييييييييه؟

loumi يقول...

العزيزة ميمى
بابقا سعيده قوى لما بالاقى تعليقك
شوفى يا سيتى
انا مؤمنه تماما ان اى انسان سواء رجل او امرأه عايز يعمل حاجه حيعملها
وباحب اشوف الامور من اكتر من وجهه نظر
يعنى حطى نفسك فى مكان راجل بيحب مراته وفجأه لقى نفسه بيحب واحده تانيه تفتكرى حيعمل ايه؟
فى اكتر من حل بس كل واحد بيختار الحل اللى يقدر عليه
حطى نفسك مكان زوجه الرجل ده
لو صارحها حتعمل ايه؟
ولو قالها ده شرع ربنا وانت مش حتقدرى تمنعينى
وحطى نفسك مكان الانسانه التانيه
اللى يمكن حظها الاسود ههههههههه حطها فى الموقف ده
بس تفتكرى انه الافضل جوزك يتجوز عليك بعد الشر بعد الشر
والا يعرف عليكى واحده تانيه؟
بعد الشر بعد الشر برضه
والدتى مع الرأى الثانى
عشان ربنا يعاقبه عقاب شديد
دنيا واخره
تحياتى

امرأة تقول الذي لا يقال يقول...

بجد جميلة جدا
وصعبة جدا جدا

أنا كان عندي نجربة مماثلة وقريبة جدا
وكنت على العكس منك شايفة ان انا ممكن جدا اكون زوجة تانية
لكن بعد كده بجد لما ربنا هداني وعقلت شوفت اني بجد من حقي اني اكون الاولى والاخيرة في حياة شخص يستحق

ربنا معاكي ويقويكي ويهديكي للخير

mimi يقول...

الكلام في الموضوع ده شائك ومش بيخلص ولو في اختيارات زي اللي قلتيها هوافق على الاختيار الاول مع اعتذاري لوالدتك لكن في الحالة دي هيبقى نصف زوج من الناحية الشكلية ومن الناحية العاطفية والرومانسية ما اعتقدش انه هيكمل ربع حبيب حتى
لان ابو بالين كداب وابو تلاتة ايه؟؟؟
ومن ناحيتي انا لو اصبحت زوجة تانية هكون زوجة وبس لكن قلبي ساعتها محدش له دخل بيه هيبقى بتاعي انا لوحدي
سعدت بردك ودد ولادتك هلكني من الضحك لدرجة ان الناس اتلموا على صوت ضحكي
تحياتي

loumi يقول...

امرأه تقول الذى لا يقال
عزيزتى
سعدت بزيارتك وكلماتك الرقيقه
اما عن التجربه
فأنا اتمنى لك ان تقابلى الانسان الذى يستحققك فعلا ويحافظ عليك ويحبك بصدق
وعموما انا لا استطيع ان اكون ضد الجواز الثانى ولكن بشرط ان يكون هناك توافق ومصارحه لجميع الاطراف
والزوجه الثانيه يجب ان تعلم انها جزء من كل وان هذا الزوج لن يكون لها وحدها
وليس من حقها فى اى وقت ان تتذمر من هذا الوضع
فهى قبلت ان تكون دائما فى المرتبه الثانيه
تحياتى لك

loumi يقول...

ميمي العزيزة
سعيده ان رد ماما ضحكك
اصل انا لما قالتلى الكلمتين دول
اندهشت من الثقه اللى عندها
بس رجعت قلت
اه اصل بابا راجل امير ومش بتاع الحاجات دى عشان كده هى بتتكلم بكل ثقه
انما لو كان والدى من الرجاله اياهم مش عارفه كان موقفها حيبقا ايه
بس اعتقد ان موقفها كان حيبقا هو هو
وكانت حتقول له
يانا يا الثانيه وانت حر
وخلص المشهد على ان بابا كان حيراجع نفسه ويقلش الست الثانيه
ههههههههههههههههههه
حلو الخيال ده؟؟؟
لقيتى القلم والا لسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسه؟
سلام يا قمر

S H A H يقول...

لما شفت برج الحوت ما استغربتش ان صاحبته تبقى شاعرة و حالمة زيك يا لومي
بجد البوست هايل

loumi يقول...

لالا
لالالالالالالالالالا
لالالالالالالالالالالالالالالالالالالالا
انا مش برج الحوت خالص
انت شفته فين ده؟
شخصيتى ضاعت
هههههههههههه
انابرج والا بلاش اصله برج المجانين
هههههههه
ربنا يخليك
وسعدت بزيارتك

S H A H يقول...

ايه ده انا ايه اللي لخبطتني كدة؟؟

اه صحيح انتي برج الجوزاء, يبقى انفصام في الشخصية على طول

بس هتبقي احلى مجنونة

تسلمي ياقمر على زيارتك الجميلة, ما تيجي اشربك بيبسي باالايس :)))))))

Blank-Socrate يقول...

فأنا الاقوى بضعفي
يا عينى على الكلام العميق انا حاسس انى فاهم و مش عارف اشرح

loumi يقول...
أزال المؤلف هذا التعليق.
Xee يقول...

لومي

شخصيا بعتبرها من أجمل ما كتبتي

اختيار الكلمات كان في قمته بصراحة

تصفيق حاد، و زعلان اني مقريتهاش أول ما نزلت

=============

هههههههه جدوووووووو
و الله تعليقاتك دي انا كنت محروم منها بقالي اسبوع

تحياتي

loumi يقول...

زىىىىىىىىىىىىىى
حمدلله على السلامه
مبسوطه ان الكلمات عجبتك
وبرضه
قام محمد منير بزياره .......
تحياتى ليك