الأربعاء، يوليو 4

ألبوم صوري

ألبوم صوري مليان
صور أشكال والوان
دي أول خطوة أخطّيها
ودي اول ضحكه أعلّيها
ودي يوم ما خدت شهادتي
ودى صورة في يوم خطوبتي
وتعدي سنين وايام
و ف يوم ماقدر أنام
أفتح ألبوم صوري
ده بيحكي عن يومي وأمسي
ومع كل صورة تصحى
ذكرى قديمه ونايمه
صور أضحك عليها
وصور بسرعه أعدّيها
وصور مش لاقياها
مع إنّي دايما فاكراها
ياه!! الله يا سلام
إيه الصورة ديّه؟
جميله قوى وبهيّه
فين كانت من زمان
بس الغريبه إنّي
مالقيت لهاش عنوان
وفجأه صحيت لقيتني
نايمه فى حضن صوري
أدور ع الصورة لكن
أتاريها فى الأحلام
وكل ما احب اشوفها
أحضن فى صوري وانام

هناك 41 تعليقًا:

mimi يقول...

انا اول تعليق مش ممكن انا سبقت واللي سبق كل النبق
هههههههههههه
بوست لذيذ تسجيل الذكريات عن طريق الصور حاجة جميلة بس ساعات بتبقى حاجة مؤلمة لو الموقف الواحد مش عايز يفتكره او لما يشوف صورة قديمة ويحس قد ايه هوكبرطبعا انت عارفة ان الستات مش بتحب تكبر
هههههههههههه
طبعا اجمل الصور هي اللي في خيالنا اللي محدش يقدر يشوفها غيرنا
كلمات بسيطة ورشيقة وسلسة
تحياتي

غمض عينيك يقول...

كلامك جميل اوي يالومي وماستبعدش فعلا انك قولتيه وانت بتتفرجي على صورك

تحياتي ليكي
محمد سمير

gohayna يقول...

لومي يا بتاعته السما البيضا الغيمه

انا جيتلك اهه
هههههههه
فهماني طبعا

ماعلينا

هقولك علي حاجه

كنت من فتره في مدونه هارملس
وكان كاتب موضوع عن صندوق الزكريات الي عنده

وازاي كل صوره بتحكيه عن شيء في حياته

كلامه وكلامك هنا وصورك الي حطيتيها

فكروني بدرجي في دولابي في بيتنا في مصر

مش هتصدقي الدرج دا فيه كميه ورق وصور ومذكرات وحلويات ولبان وشكولاته
كل حاجه منهم ليها معني ومناسبه جميله عندي

مخدتش منهم غير صوره عزيزه عليا اوي هنا كنت فيها مع اصحاب ليا بعزهم وبحبهم جدا

وقطعه شكولاته حلفا مكلهاش ابدا
كانت برضه من شخص عزيز عليا جدا

تقريبا هحنطها
ههههههههههههه

كل حاجه في درجي بترجعني 15 سنه ورا
من اول ما ابتديت الملم اوراقي وقصاقيص كامات كانت في اخر كشكيلي في المدرسه

وصور لناس واشخاص يمكن دماغي مش فاكره اساميهم لكن فاكره مواقفهم وانفاسهم كمان

الدرج دا بقعد قدامه وانسي نفسي يا لمي

وكل ما اقرر افضيه وارمي الي ملوش لزمه
يصعب عليا كل حاجه فيه

انتي برضه هنا زي

كل الي قولتيه صح

سعات بندور علي الذكريات من خلال الصور ومش بنلاقيها

وسعات بندور عليها من غير صور وبتتمثل قدمنا باجمل شكل

صورك حلوه يا لمي

ربنا يهنيكي ويسعدك
يارب


تسلم ايدك يا قمر

islam يقول...

السلام عليكم ورحمة الله وبركاته

لومى
جميلة جدا الفكرة والكلمات
بس أكتر حاجة عجبتنى، الصورة اللى حسيتى إنك شايفاها بين صورك
ولما صحيتى طلعت حلم
حسيت ان هى دى الصورة اللى كلنا كان نفسنا نتصورها، بس متصورنهاش على ورق
لكن ظلت فى خيالنا نشوفها فى الأحلام

مع خالص اعجابى
السلام عليكم ورحمة الله وبركاته

عصفور المدينة يقول...

رائعة فعلا
أحلامنا دائما أجمل من واقعنا

يا مراكبي يقول...

يااااه .. شعور جميل قوي

صورة بتدوري عليها ومش لاقياها؟

وصورة مش موجودة غير في أحلامك بس؟

معنيين فيهم جمال عالي جدا .. فيهم رقة محسوسة جدا

ربنا يسعدك كمان وكمان

Xee يقول...

كل سنة أنوي أعمل المشروع ده و معملوش، لغاية ما جيت السنة اللي فاتت و قررت اني انفذه

رحت جايب البوم صور كبير، و لميت كل الصور القديمة و الجديدة و رتبتها و عملت الالبوم اللي كنت عايز اعمله من زمان

بس تتصوري، احيانا بخاف افتحه، عشان فيه صور ناس واحشاني، و صور تانية مش عايز اشوفها
بس بيفضل الالبوم كله على بعضه بدون حذف او تعديل يمثل ذكرياتنا بحلوها و مرها

الا بالحق، السلايد الجبار اللي فوق ده كان بتوجيهات مين؟
ههههههههههههه

تحياتي

عدى النهار يقول...

ألبوم صورك جميل.. سلايد وكلمات
وفكرة الصورة الحلم أجملهم
لكن ياترى لو أصبحت حقيقة ممكن تحتفظ بجمالها؟

loumi يقول...

الغاليه ميمى
منوره البلوج بأول تعليق
اصل الصور فى بيتنا حاجه صعبه شويه
بابا عنده شنطه سفرمليانه صور ابيض واسود من سنين ما طلعتش من الشنطه
ده غير بقا صورى واخويا واحنا صغيرين كل عيد ميلاد
يعنى تلال من الصور
هههههههههههههه
وافراح وسفريات
يعنى توثيق كامل لكل اللحظات الممكنه
بسزى ما قلت بتفضل الصورة الحلم اللى بتسعدنا مجرد ما نتخيلها
و نقدر نسترجعها فى خيالنا فى اى وقت
تحياتى يا قمر

loumi يقول...

العزيز محمد سمير
تسلم يا رب
وفعلا انا مش باعرف اكتب الا الكلام اللى ممكن اقوله فعلا
تحياتى

loumi يقول...

العزيزة جي جي
ايوة ايوة طبعا فاهماك
ههههههههههه
فى ناس ومواقف بيفضلوا فى ذاكرتنا بس فى ركن بعيد قوى
وما بيظهروش غيرلما نشوف الصور دى فعلا فى البوم فى درج
بس فى ناس ومواقف فى ذاكرتنا حاضرين دايما حتى لو مالهومش صور فى الالبوم او الدرج
ناس لا يمكن يتنسوا بملامحهم ومواقفهم معانا
عشان كده نصيحتى لك
كلى حته الشوكلاته قبل النمل ما يسبقك وياكلها
ههههههههههههه
فكرتينى بالمشهد المتكرر فى الافلام من القديمه للحديثه
لما البطل يسلم على البطله
فواحد منهم يبقا مش عايز يغسل ايديه عشان السلام ما يروحش
ههههههههههههههه
اسمعى الكلام وكليها
الانسان ده حيفضل فى ذاكرتك حتى من غير حته الشوكولاته
الا لو كانت من نوع سكه ومش حلو
فاهمانى طبعا
ههههههههههههه
تحيات يا جميله

loumi يقول...

العزيز إسلام
وعليكم السلام ورحمه الله وبركاته
كل الصور اللى فى الالبوم واقع عدى وفات
اما صورة الحلم فهى لم تتحق بعد وهذا اجمل ما فيها
وربنا يحقق كل أحلامك يا رب
سعيد ان الفكرة والكلام عجبك
السلام عليكم ورحمه الله وبركاته

loumi يقول...

العزيز عصفور المدينه
اشكرك على تعليقك
فعلا اجمل ما فى الاحلام انها لم تتحقق بعد
وتتحول الى واقع
تحياتى

loumi يقول...

العزيز
الباشمهندس احمد
اولا اشكرك على وضع لينك ألبوم صورى عندك ده كتير عليا يا باشا
ثانيا اسفه انك اظطريت تنشف الأرض عشان ما حدش يتزحلق
هههههههههههه
ثالثا وده الأهم
حاسمع الكلام واحاول ابقا اعيط هنا قبل ما اروح اعلق عندك
هههههههههه
ده من بعض ما عندكم يا فندم
طمننى الحاجه وافقت والا لسه؟
تحياتى
لك وللحاجه والاولاد

loumi يقول...

زىىىىىىىىىىىى
يا جماعه الخير
القاصى يعلم الدانى
السلايد شو اللى معمول عندى ده فكرته جت لما دخلت عند الاستاذ زياد
لقيته عامل سلايد ما يتشافش
قلتله لما انت مش قد السلايد شو عامله ليه؟
رجع تانى يوم عدله قلت بس الواد خد كورس من ورايا
اتارى الاستاذ تلقى مساعده خارجيه
بس هو ما بخلش عليا بالنصيحه صراحه
اظن كده عدانى العيب
وعموما المشكله كانت فى النت يا زياااااد
بس برضه لولاك ماكانش ظهر للنور حلو الكلاااااااااام
ولا اقول كماااااااان
يا عالم يا هو
ههههههههههههههههههههههه
بجد انا كنت حاكتب اول تعليق عندى بالكلام ده بس قلت مش ظريفه يعنى
وسلم لى على محمد منير
وخللى بالك كل كلمه محسوبه عليك
ههههههههههههههههه
تحياتى
وسلام خاص لامبومبه
والا اقولك انا حابقا اسلم عليه

اه يا دماغى يقول...

احلى حاجة الذكريات

ذكريات الطفولة

ربنا يسعد كل ايامك

loumi يقول...

العزيز
عدى النهار
اشكرك على كلامك الرقيق
فعلا انا لما ابتديت اكتب لقيت ان اجمل صورة هى صورة الحلم لانها ما فيش معاها ذكريات لانها شىء لم يتحقق بعد
وأظن بل أكاد اجزم بأن جمالها فى عدم تحققها بعد
لانها لو تحققت ستتحول الى ذكرى وليست كل الذكريات جميله
اما الحلم فهو اجمل ما نملك
تحياتي

loumi يقول...

اه يا دماغى
اهلا وسهلا
فى نظرى كل الذكريات
بحلوها ومرها جميله
لانها محصله تجارب ومواقف نمربها فى حياتنا
تمنياتي لك بالتوفيق ودوام السعاده
تحياتى

Unknown يقول...

الله عليكى بجد
كلامك لمسنى اوى اوى اوى .. نفس اللى بيحصلى لما بشوف صورى بالظبط

البوست يجنن والصور جميلة

يارب تبقى كل ذكرياتك حلوة وسعيدة

وتسلمى دايما يالومي
:)

loumi يقول...

العزيزه انسانه
ازيك؟
وإزاى كاميكاز؟
وإيه اخر أخبارك؟
سعيده ان الكلام لمسك
ده عشان انت انسانه جميله
النتيجه طلعت والا لسه؟
ربنا يوفقك يا رب
تحياتى

اسكندراني اوي يقول...

البوم صورك مليان ذكريات
زي البوم صورنا كلنا
الذكرى ورا الذكرى
ودا كان ودي كانت

بس الذكريات مش في الالبوم بس
لا دي في العقل وفي الفلب كمان

تحياتي

Gid-Do - جدو يقول...

لومى

ايه ذنبى ايه
ماتقولى عليه
اشوف صورك ليه
ترعبنى ليه
لو كنت حبيبى
.
.
لحن يازياد

loumi يقول...

العزيز اسكندرانى قوى
كلامك صحيح
ذكريات مع كل صورة
ذكرى حلوة و ذكرى مرة
بس اجمل صورة اللى فى خيالنا دايما ولسه ما اتصورتش
تحياتى

loumi يقول...

جدو يا جميل
وحشتنى تعليقاتك
ذنبك انك حبيبى
بس كلام فى سرك
ولا واحده من الصور دى ليها علاقه بيا
اوعى تقول لحد
فيك من يكتم السر؟
سلام يا جدوووووو
زياد مش فاضى يلحم
هههههههههههههه
تحياتى

hosnysoliman يقول...

الصورة الفوتوجرافية تصور لحظة ولكن كل لحظة من هذه اللحظات يوجد معها مشاعر واحاسيس لفترة من العمر..منها لحظات لا تنسى واخر ليس لها ذكرى سوى لحظة اللقطة واخرى لا نحب ان نتذكرها اتمنى لك ان تكون كل لحظات عمرك الاتية اجمل وافضل

loumi يقول...

العزيز الاستاذ حسنى
اسعدنى تعليقك واشكرك على الزياره
ولما رجعت للمدونه عندك سعدت بعودتك
فحمدا لله على سلامتك
وعودا حميدا بإذن الله
تحياتى

كراكيب عادل يقول...

بجد كلام كلة رقة واحساس

تخيلتك وانتي فعلا بتتفرجي علي صورك

لان انا بيكون لي يوم كامل بنوي فية

اطلع كل حاجة قديمة وافرشها قدامي

واعمل لها درج ومعها درج لذكرياتي

يمكن خايف انساها

وصلنا لدرجة الخوف اننا ننسي الذكري

ومع ان الصور استحالة تجمع احلي اللحظات بس اهو الموجود

:)

صورة مش لاقياها مع اني دايما فاكرها

هي دي

كراكيب عادل يقول...

اعمل لها جرد **** خطاء ووجب التصحيح

معلش بقي السبت الصبح بداية الاسبوع

loumi يقول...

صباح الخير يا عادل
تصدق فعلا فى لحظات ومواقف بتبقا جميله جدا ومحتاجه تتصور بس للاسف ما بيحصلش
متهيألى فعلا ان الصور دى هى اللى بتفضل فى ذاكرتنا حتى لو دورنا عليها فى الألبوم وما لقيناهاش
-----------------------------------
عادل تانى مرة
صباح السبت برضه
اتفهم المعنى بعد التصحيح يا فندم
:):):):)
اوقات بيخطر فى بالى اققطع صور وبعدين اقول لا خليها
يمكن تنفع :):)
سلام

Gid-Do - جدو يقول...

لومى

بما ان الالبوم طلع برانى

اهدى زياد فى الاحراش
وطنت فوقية اللى ساكنة فوق
وعمو بطيخة

اغنية الافى من فيلم الكيف

اه ياافى ..اه ياافى

اه يااقفى

مع الحكمة الخالدة

لولاك يالسانى ما تلسعت ياقفايا

تحياتى ياعسل

S H A H يقول...

عمال اركز في الالبوم مرة الاقيكي و انتي صغيرة سمرا و بعد كدة اتحولتي بلوند بقدرة قادر
الله دش شكلها درست برة بقى
اتاري الالبوم كله فشنك
كدة يا لومي

بس اجمل ما في البوست كلماته بجد عجبتني

loumi يقول...

صباح الفل يا جدو
عامل ايه؟
الجو العام مش حلو اليومين دول
والواحد زهقااااااان وطهقاااااااان
وتعليقاتك هى اللى بتطي على قلب الواحد
مش عرفه فيه ايه
بس اللى فى الاحراش بيقول تقريبا فى حاجه فى ميه النيل
هههههههههههههههههه
تحياتى يا جميل وما انحرمش من تعليقاتك يا رب
سلام

loumi يقول...

صباح الخير يا شاه
معلش ما كنتش عارفه انك حتمقق عينيك فى الصور قوى
و كويس انك اكتشفت انه فشنك
هههههههههههههه
سعيده ان الكلمات عجبتك
ومبروك المجهود اللى انت عامله صحيح
وانا قاعده اقول ايه يا اخواتى الراجل اللى فارد غضلاته علينا ده
بس بجد مجهود جامد جدا
تحياتى
الميدايه حتلاقيها فى المكتبه اللى جنب بيتكم على طول
ههههههههههه
تحياتى

klmat يقول...

كلام جميل وفيه موسيقى عذبه ومعبره
لما بنشوف الصور القديمه بنفتكرالماضى واحداثه على رأى مارى منيب فكرتينى بالذى مضى بس الربط بين الصور والحلم جميل
احييكى على اسلوبك مع اجمل الامنيات

فى القلب يقول...

أنا برده لما بشوف الصور القديمه
بحس بأحساس جميل أوى
الأغنيه الموجوده عجبتنى أوى

Gid-Do - جدو يقول...

لومى

الف سلامة
ابعد يازهقااااااان
ابعد ياطهقاااااااان
رقيتك واسترقيتك
حدرجة بدرجة من كل عين زرجاـ زرقاء ـ

شاب نفسة يحقق حلمة يقول...

بوست حلو ولذيذ كمان
فعلا احلي ذكريات اللي الواحد بيفتكرها بالصور
بيفتكر كل حاجه حصلت والصوره دي بتتصور تحياتي
وليه بقالك كتير ش تيجي عندي
تحياتي

loumi يقول...

العزيزة klmat
اشكر لك زيارتك مدونتك جميله ومهمومه زينا بكل المشاكل الغريبه اللى بتواجهنا يوميا
تمنياتى لك بكل خير
تحياتى

loumi يقول...

فى القلب
فعلا جميله اللحظات اللى بنقضيها مع الصور نتذكر اشياء قديمه جدا منها ما يفرحنا ومنها ما يحزننا
اتفضلى الاغنيه ما تغلاش عليك
تحياتى

loumi يقول...

جدو
الله يسلمك يا جميل
حرقت لى كزبرة ناشفه؟
وعين العفريت؟
وشكشكت العروسه والا لسه؟
ما انحرمش منك يا جميل

loumi يقول...

عزيزى طارق
فعلا الصور والذكريات جميله
بس اجمل الصور هى اللى فى خيالنا
زى الخيال اللى عندك بالظبط
تحياتى