الجمعة، سبتمبر 21

الى من يهمه الأكل :)

فتة المجدوس
اولاً شرح لكلمة مجدوس
المجدوس عباره عن باذنجان صغير يتم سلقه
وبعد تصفيته من الماء يتم تجهيز حشو مكون من عين جمل
أيوة عين جمل وفلفل احمر بس مش حرّاء وثوم مفري وملح بمقدار كاف
وبعد ذلك يوضع في قطرميزات ويصفى للمرة الثانيه للتخلص من بقايا ماء السلق
ثم تغمر الكميه كلها بالزيت زيت زيتون طبعاً
يعني يا صايمين خراب بيوت مستعجل
:):):):):)
اه معلش
كلمه قطرميزات يعني برطمانات
طبعاً هذا المجدوس له مواسم لعميله وهو هذه الأيام
وهو من ضمن ثقافه المونه التي يتبعها الشعب السورى
حيث يتم تخزين انواع معينه من المأكولات التي تستخدم
في وجبتي الإفطار والعشاء طوال السنه
مثل الزيتون والمجدوس واللبنه والجبن
من السنه للسنه ويمكن ده عشان ظروف البلد شديدة البرودة شتاءاً
المهم إن فتة المجدوس والتي سوف اكتب لكم طريقة عملها
ليس لها علاقه بهذا المجدوس الذي وصفت طريقة عمله
ولكن جرت تسميه هذه الأكله بقتة المجدوس لانه يتم استخدام
الباذنجان الصغير ولكن يتم حشوه باللحمه والبصل العصاج يعني بلغتنا هنا
وبما انه لا يوجد لدينا هذا النوع من الباذنجان الصغير المكلبظ حبتين
فسوف استعيض عنه بشرايح الباذنجان الرومي
كفايه عليكم كده ونكمل بكره؟
إيه ؟إيه؟
ما أبقاش غلسه واكمل؟
حاضر حاضر
من غير زق
ههههههههههههههههه
المقاديرو طريقة التحضير
حبتين باذنجان رومي تقشر وتقطع شرائح وتقلى في زيت غزير
بصله كبيرة مفريه ناعم
لحمه مفرومه ناعمه حسب الرغبه
ويفضل ان لا تكون كميه اللحم كبيره
ملعقة كبيره صلصه
ملح فلفل
يتم عمل العصاج بالطريقه المعروفه
توضع شرائح الباذنجان المقلي سابقاً في طاسه ويوضع عليها العصاج وترفع قليلاً
على النار ليتشرب الباذنجان الصلصه
عدد واحد رغيف عيش شامي او لبناني من الحجم الكبير
يتم تقطيعه مربعات بالمقص ويتم قليه فى زيت غزير
يمكن وضع العيش المقطع فى الفرن ليم تحميصه بدلاً من قليه وذلك أخف وأفضل
عدد اربعة اكواب زبادي بلدي من الكبير
ملعقتين إلى ثلاث ملاعق طحينه كبيرتين
عصير ليمونتين
ملح وفصين إلى ثلاث فصوص ثوم مفريين ناعم جداً
يتم خلط الثوم والزبادي والطحينه وعصير الليمون جيداً لنحصل على خليط متجانس
بكده أصبحت كل المكونات جاهزة
مطلوب أيضاً
بقدونس مفري وصنوبر محمر بمقدار ثلاث ملاعق
وملعقتين سمنه او زيت حسب الرغبه
لتقديم هذه الفته نقوم بإحضارصينيه بيركس متوسطة الحجم
نفرش العيش اولاً ثم نضع عليه الباذجان والعصاج بعد ان يكونوا قد تشربوا الصلصه
:)ثم نصب المزيج المكون من الزبادي انف الذكر
ثم نقدح ملعقتين السمنه وقبل صبها على وش الصينيه نفرش البقدونس والصنوبر
ويجب ان نسمع صوت الطشطشه بتاعة السمنه وهي نازله على خليط الزبادي
وإلا حتضطروا تعملوا الاكله من الأول
ههههههههههههههههه
وتقدم ساخنه طبعاً وتسمّوا وتدعوا لي وانتوا بتاكلوا
يا خوفي لتدعوا عليا

هناك 46 تعليقًا:

اسكندراني اوي يقول...

الله الله الله

ايوه كده اتحفينا بكام حاجه من المطبخ السوري الجميل

الف هنا وشفا

تحياتي

Gid-Do - جدو يقول...

لومى

متخفيش اى واحد يعرف فى الطبيخ راح يدعى عليكى قطعا ـ من تمن المكسرات زى الصنوبر وعين الجمل ـ اللى هما بتزرعوا فى سوريا ـ وكمية الزبادى ـ اللى معظم السوريين بيعملوة فى البيت ـ

على فكرة نصف كيلو الصنوبر هنا دفعت فية عشرة دولار وكان فى محل جملة
نفس السعر تقريبا لعين الجمل

كل سنة وانت طيبة ـ

عدى النهار يقول...

ياخبر أبيض على كمية الدسم اللي فى الأكلة دى

وطشطشة سمنة كمان!! كنت فاكر إن موضوع الطشطشة ده إختفى من قاموسنا الأكلى خلاص

(:

بالهنا والشفا

درش يقول...

اكيد الأكلة حلوة من غير ما أدوقها.
طبعاً مش هأقدر أكلها دلوقت عشان أنا صايم.
أبقي سبيلي حتة في البلوج أكلها بعد الفطار.
و بالمناسبة طالما إنت تعرفي سوري كويس و بتقدميلنا كلمات من اللهجة السورية.
يعني إيه ولو؟
أصلي كان ليا صديق سوري على الشات و كان دايماً يقول ولو و كنت بأنسى أسأله.
يعني إيه و لو؟
و شكراً

فى القلب يقول...

ممممممممممممم هم

أيه الجمال ده يا قمر
واللهى كنت عايزه طريقتها من زمان

وده يشجعنى أطلب منك طريقه عمل أكله سوريه برضه أكلتها عند سورين بس مش فاكره أسمها كانت روعه

مكونتها زبادى و قطع فراخ و عيش محمر

و ياريت يا قمر شرح كده كام أكله سوريه على زوقك معروف اكل السوريين خفيف و شهى

.:.-=- ELGaZaLy-=-.:. يقول...

كل دى مكونات يا لومى؟؟

وطشطشة سمنة؟؟

لا اسافر سوريا افطر هناك يوم اريح بجد

loumi يقول...

العزيز إسكندراني اوي

الله يهنيك يا رب

بصراحة طقت في دماغي إمبارح حكايه الأكل دي مع إن المفروض الناس في رمضان تقلل أكل
بس بصراحه اللي حاصل غير كده خالص
الناس زي ما يكونوا ما بياكلوش السنه كلها وياكلوا في رمضان بس

تحياتي

loumi يقول...

جدو يا جدو


الحمد لله إنك طمنتني
ههههههههههههه
إنت عارف
أنا باعمل الزبادي في البيت
ويا سلام بقا لما تعمله فى طاجن فخار
زي زمان
أما موضوع المكسرات وبالرغم من بلاد الشام عموما بلاد المكسرات
إلا انهم مش بيشتروا الكميات المهموله اللي المصريين بيشتروها يمكن لانه متوفر فى اي وقت
وبعدين فيه كميات بيتعاملوا بيها فى الوزن مش موجوده في مصر أصلا
زي الوقيه
وهى عباره عن 200جرام
و ممكن تشتري نص او ربع وقيه
من عند البقال وبلا حرج
يعني البقال مش حيقول عليك فقير وإلا ما معاكش بس إنت بتشتري الكميه اللي لازماك
زي فى اوروبا ممكن تشتري شريحتين لحم وكمثريتين وشريحه بطيخ مثلا
واكيد في اميريكا نفس الحكايه


وانت طيب يا جدو

loumi يقول...

العزيز مدحت

فين الدسم ده؟
هههههههههههه

دول يا دوب معلقتين
سمنه وانا قلت ممكن الإستعاضه عنهم بالزيت
وبعدين شىء طبيعي لما اي سائل سخن ينزل على الزبادي البارد لازم يطشطش
وإلا إيه رأيك؟
:)
حتى العيش يمكن تحميصه في الفرن بدل
قليه فى الزيت

يعني الشاطر يتصرف

تحياتي وكل رمضان وانت والاسره جميعاً بخير

loumi يقول...

العزيز
درش
يا سلام حاضر يا فندم
صنيه بحلها تروحلك في البلوج
:):):)
بس انهي واحد حضرتك؟
ولو
كلمه من الكلمات التى ليس لها معنى محدد
يعني ممكن تقول
ولو حاج كذب
يعنى بطل كذب
يعني تفهم من سياق الحديث
يعني لو قلت حاجه
وواحد قلك ولو
ممكن يكون مش مصدقك
او عايزك تاكدله
بمعني
يا راجل؟
تقريبا انا توهتك
ههههههههههههههههههه
عموما الكلمه دي بيستخدمها السواحليه اكثر من الشوام
فهمت حاجه؟
لو فهمت إبقا اشرح لي
:)
والعفو

loumi يقول...

العزيزة اوشا
طيب ماكنت سألتيني
ههههههههههههه
يا رب فعلا تقدري تستفيدي من الطريقه
وبالنسبه للاكله اللي بتسألي عليها
هى فتة فراخ برضه نفس خلطة الزبادي
والعيش المحمص
بس بدل الباذنجان قطع فراخ مخليه مسلوقه ومتبله ملح وفلفل واي بهارات تحبيها
وفي ناس بتقلبها في شوية زيت برضه قبل ما تفرشها على العيش بس بتبقا دسمه قوي وبعدين تفرشى خلطة الزبادي عليها وتزوقيها بقدونس وصنوبر
وما تنسيش طشة السمنه
ههههههههههههههههه
الاحسن زيت ذره طبعاً

وبالهنا والشفا
تحياتي ياقمر

loumi يقول...

العزيز غزالي

ماشى
:):):)
بس إبقا قول لي وإنت مسافر
عشان أبعت معاك جوابات
هههههههههههه

رمضان كريم

حسن مشالي يقول...

الله عليك وعلى وصفاتك الجميلة
بس اكيد اكلها حلو زى وصفك لها

ممكن اى حد يستفيد من الوصفة
وتعطينى نصيبى جاهز كدا اريح لى واوفر

على فكرة ابقى عدى عندى علشان تعرفى حكاية البهاء وصافيناز
انا اجبت اسئلتك عنهم

كل التحية والتقدير

loumi يقول...

العزيز حسن

هي بس لو مش المسافه بعيده قوييييييييييي


كنت عملتكم صنيه وبعتهالكم
عموماً حنبقا نلاقي طريقه بإذن الله
:)
اشكرك على التوضيح

تحياتي

يا مراكبي يقول...

أنا هأقفل الصفحة بسرعة لحسن الحاجة تفتكر المجدوس وتقوم تعمله على الفطار .. أصلي بيني وبينك ما بحبوش .. بس طبعا ده مالوش علاقة بفكرة البوست الجميلة وبالذات العنوان الجميل اللي فوق

He and She يقول...

Lucky the man who will marry you because he will always healthy.

islam يقول...

لومى
السلام عليكم

يصراحة لست ممن يهمهم الأمر
وكفاية عليه الكبده البانيه اللى ماما عملتهالنا إمبارح
ولا الكوسه البشمل اللى عايزه تعملها !!!؟
لأ .. كفاية كده
هههههههه

كل سنة وإنت طيبة
السلام عليكم

سندباد يقول...

يعني نتكل علي الله ونغامر

درش يقول...

لأ أنا كدا فهمت ميه ميه.
و شكراً على الشرح.
و على العموم اللهجة السورية سهلة قوي و تتفهم و كمان حلوة قوي.

اسكندراني اوي يقول...

عدنا الى قواعدنا
ما نقدرش على زعل الحبايب

الربان يقول...

تحياتي

ما أجمل الباذنجان المكدوس ...لذيذ الطعم فعلا...
لم أتذوق فتة المكدوس من قبل ...لكن من طريقة سردك للوصفة...تبدو لذيذة ..بالهنا و الشفا علي كل من يصنعها و يتمتع بها.

تحياتي.........

DARK يقول...

لومى
ازيك يا قمر؟
جميلة كده شكلها
إن شاء الله لما أفضى اعملها
واكيد هادعيلك
كل سنة وانتى طيبة

loumi يقول...

العزيز الباشمهندز
أحمد
ههههههههههههه
أصل الأكل تعود زيه زي أي حاجه الواحد بيتعود عليها
أنا والدتي ما حبتش المانجه ابداً في الاول ولا الجوافه
ربنا سهل وإتعودت على المانجه بس الجوافه مش نازله لها من زور
هههههههههههههههه
فكرة البوست جت من الجوع قبل الإفطار
:)
تحياتي للحاجه
ولك طبعاً
:)

loumi يقول...

العزيز
he&she
الإنسان لما بيحب نفسه
وبيبقا مؤمن إن صحته نعمه من عند ربنا
وإنه سوف يسأل عنها يوم الحساب
لازم يحافظ عليها
وده طبعا بينعكس على الناس المحيطين بيه
اشكرك على كلماتك
تحياتي

loumi يقول...

العزيز إسلام
وعليكم السلام ورحمة الله وبركاته

ربنا يخليهالك يا رب
و رمضان كريم

سلام خاص للوالده
تحياتي

loumi يقول...

العزيز سندباد
حتعمل إيه؟

لا لا


ما تتهورش


:):):)


تحياتي

loumi يقول...

العزيز
زميل المهنه
darsh
الحمد لله إنك فهمت
هي برضه اللهجات ممكن تتعود عليها لو انت حابب
يحلّي أيامك يا رب
تحياتي

loumi يقول...

العزيز إسكندراني قوي

حمد لله على السلامه

هو كان سؤال بس

عارف لما بتتعود على شكل معين وترتبط بيه بتحس بغربه لما يتغير


وشكل مدونتك كان بيبعث عل التفاؤل
والحمد لله عاد لها شكلها الجميل
تحياتي

loumi يقول...

العزيز
الربان صاحب سفينة الحريه

في مصر
أي حد يسمع إن في باذنجان ومحشي عين جمل
بيستغرب
مش عارفه ليه؟
يمكن عشان الباذنجان أكله شعبيه وعين الجمل أكل ذوات
:):):)
وأظن إنه بيتباع فى دول الخليج فى برطمانات جاهز

فتة المجدوس حلوة فعلاً بس عندي الأولاد مش بيحبوها
عشان كده أنا وماما وبابا بس اللي بناكلها
والله يهنيك
تحياتي
ورمضان كريم

loumi يقول...

الغاليه
dark
أنا الحمد لله كويسه
وإنت؟
لما تعمليها تبقي تقولي لي النتيجه
:):):)
وربنا يتقبل منا الدعاء
وانت طيبه يا غاليه

حسن مشالي يقول...

السلام عليكم

شرفتى المدونة ولم تمرى على صافيناز

فى شكر وسؤال لك من كام يوم

تحياتى وتقديرى

حسن مشالي يقول...

انا رحت هناك وعرفت انك هنا فجيت اقولك ياريت تتفضلى هناك

تحياتى

أحمد سلامــة يقول...

وكمان سمنة
انا جعععععععععععععععت
لازم صورة يعني
:)

Hannoda يقول...

مافيش مراعاه أبدا كده للجعانين و الصايمين؟؟
:(

واضح ان ميول ستات البيوت في رمضان بدإت تظهر في المدونات

أنا بحب المجدوس جدا و ماما بتعملهولنا دايما لإنها كانت تعرف ناس سوريين و اتعلمت منهم حاجات كتير

لكن الفتة ده جديدة

بس حاقراها تاني و أحفظها لإني بحفظ وصفات الأكل بسرعة جدا و بالذات لو جعانة و حارجع أحكيها لماما و أحكيلك النتيجة بعد الفطار
ماشي؟؟ :))
وحشتيني قوي

غمض عينيك يقول...

تسلم ايديك يالومي
وكويس اوي انك نشرتي البوست دا بعد الفطار

Shreef يقول...

ايوه انا من اللي يهمني الاكل بس بجد الاكل ده عايز يتاكل مش يتقري و بعز انا المطبخ الشامي بصراحة و هوا طبعا كان في كذا سؤال فني بس وقته المهم انا كنت عايز احييكي على الاغنيه اللي شغاله على البوج لانه بصراحة تحفه يا ريت تقوليلنا مين الامورة اللي بتغني الاغنيه ديه و يا ريت نشوف حاجات زي كدا..عموما دي اول زيارة ليا هنا بس بصراحة انتي فتحتي نفسي انها متكنش اخر زيارة..يلا سلام

Lapa يقول...

Do you know one of the best portuguese writers ever: CRISTÓVÃO DE AGUIAR?

ALIVE IN MY BLOG.
Thank you.

loumi يقول...

العزيز حسن

تم عمل اللازم


سلام

loumi يقول...

كلاكيت تاني مرة
حسن

أنا أسفه ما كنتش هنا
عشان اروح هناك


تحياتي

loumi يقول...

العزيز
أحمد


المفروض تدخل هنا بعد ما تفطر


هههههههههههه

معلش حقك عليا
نشيل الصورة ولا تزعل
:)
تحياتي

loumi يقول...

هنوده الإنسانه

عوداً حميداً
أخبارك إيه يا جميله؟

وحشتيني بجد

طيب إبقي جربي تعمليها وقولي لي
النتيجه

تحياتي

loumi يقول...

هههههههههه
ده من حسن حظك إنك دخلت بعد الإفطار
تحياتي
ورمضان كريم

loumi يقول...

العزيز شريف
حللت أهلا ونزلت سهلاً
اهلاً بيك في اي وقت
وفي إنتظار اسئلتك الفنيه
البنت دي طفله فلسطينيه
والإغنيه دي هديه من
عادل صاحب الكراكيب
سعيده انها عجبتك
الاغنيه اسمها رايه بيضا
بس مش كل زياره في اكل
:):):)
تحياتي

loumi يقول...

lapa
اهلين وسهلين ورمضان كريم
:)

Dr. Diaa Elnaggar يقول...

فعلا

في التدوين سبع فوائد وربما سبعمائة فائدة. ولا شك أن التعرف على العادات الغذائية للبلدان الاخري من أجمل الأشياء وخاصة إذا كانت مشروحة بالطريقة "الدسمة" مثل التي هنا. وفي حاجة عجبتني جدا في وصفك لهذه الأكلة هو أنك حاولت تقدمي لنا ربطا عقلانيا بين هذه الأكلة وبين الظروف المناخية لهذا البلد، إنها وصفة ابن خلدونية من الطراز الأول. وحاجة تانية عجبتني، إنك حاولتي تقللي من مكونات اللحمة بأكبر شكل ممكن، وده في بلد زي مصر وصل فيها كيلو اللحمة ل 60 جنيها حسب ما سمعت من أحد الأصدقاء أكبر معروف ممكن تعمليه في أي حد.

سعيد بالتعرف على صوت عربي مختلف وإن كنت أظن أن الهموم العربية الحاجة الوحيدة المشتركة في هذا الوطن المنقسم.

تحياتي واحتراماتي

ضياء

loumi يقول...

د.ضياء
حللت أهلاً ونزلت سهلاً
معرفة الناس كنوز
وطول ما الإنسان عايش بيعرف وبتعلم ويستفيد
أشكرك على الكلام الجميل ده
أما بالنسبه للشرح الدسم
فأرجو أن يكون دسم الموضوع :)
الأكل عند بعض الشعوب سد رمق
وعند البعض الاخر صورة من صور الجود والكرم والتفاخر
وقد يصل لحد البذخ في بعض الموائد
وهى ثقافة شعوب
بالنسبه لموضوع اللحم لو علم الناس ان مكعباً صغيراً منها يومياً يكفيهم لكان حالهم أفضل بكثير وأنه يمكن الإستعاضه عنها بالبروتين النباتي كالفول والعدس وغيرهما
أما سعر كيلو اللحم فقد وصل في بعض المناطق فى القاهرة لهذا الرقم فعلاً ولكن ما زالت في بعض المدن خارج القاهرة أقل من ذلك بكثير
النباتيين أفضل حالاً صحياً ونفسياً من اللحومين
تحياتي
شرفتني بزيارتك
إجابه على سؤالك الصغير
لضيق ذات الوقت فقط
تحياتي مرة أخرى